WILLEMSTAD – Reunion General di Bonaire International Airport N.V. (“BIA”) a nombra Sr. Maarten van der Scheer MSc BA komo direktor di e kompania, pa promé di ougùstùs 2022 . Ku esaki e ta sigui Jos Hillen, kende for di promé di yüli 2019 a yena e posishon ei riba base interino. Hunta di Komisario a presentá e nombrashon akí i e ta resultado di un proseso di selekshon intensivo i transparante ku a kuminsá fin di aña pasá ku sosten di Deloitte.

Marco van de Kreeke, presidente di Hunta di Komisario ta felisitá Maarten van der Scheer di kurason ku su nombrashon komo direktor: “E Hunta ta sumamente kontentu di por anunsiá ku Maarten van der Scheer ta nombrá komo e direktor nobo di aeropuerto. Maarten ta eksperto den manehá den un ambiente di maneho kompliká den kua hopi interes ta hunga un ròl. E tin eksperensia allround di aeropuerto, abilidatnan komunikativo fuerte i e ta un teambuilder ku ta kapas pa sigui desaroyá aeropuerto ku henter e tim di aeropuerto i e hopi stakeholdernan na Boneiru. Nos ta ansioso ta spera su yegada i nos ta dese’é masha éksito.”

Maarten van der Scheer (42) tabata traha na Royal Schiphol Group i e tin eksperensia amplio di 15 aña den maneho di aeropuerto, tantu den kurason di operashon komo riba nivel stratégiko den maneho superior. El a kohe eksperensia amplio den desaroyo i finansiamentu di proyektonan grandi di aeropuerto . Sr. van der Scheer: “E isla i aeropuerto por ta huntu orguyoso di loke a konstruí den hopi aña. Mi ta spera pa traha den kolaborashon estrecho ku partnernan riba e isla pa asina sigui duna forma na nos metanan komun i mi ta kontentu di por forma parti di esaki .” Pronto Maarten lo establesé na Boneiru ku su famia.

Gradisí

Hunta di Komisario ta gradisí Jos Hillen, pa su aporte i esfuersonan den último añanan. Bou di su maneho a pone stapnan importante riba tereno di siguridat. E Sertifikado di Siguridat ku ILT a otorgá pa e término maksimal di tres aña ta un prueba kla di un operashon di buelo sigur i un safety management system ku ta funshoná bon. Den un periodo turbulento despues, den kua Covid a sòru pa un fuerte kaida di kantidat di pasahero i di entrada, BIA a sa di mantené e organisashon riba pia i minimalisá konsekuensianan finansiero di e krísis, danki na un bon koperashon ku e ministerio inbolbí na Den Haag. Mas aleu a ehekutá hopi proyekto di mehorashon na aeropuerto bou di su guia i huntu ku tur kolega el a desaroyá un plan pa un programa di mantenshon di mas aña. Ku masha ambishon el a duna guia tambe, e último añanan, na e proseso pa yega na un masterplan pa aeropuerto.

Reunion General a renombrá Marco van de Kreeke komo presidente di Hunta di Komisario pa un di dos periodo di tres aña. Finalmente Hunta di Komisario ta kontentu ku Sr John Soliano tabata dispuesto pa aseptá e funshon di sekretario di HdK.

Hunta di Komisario tin e pleno konfiansa ku, ku e nombrashonnan akí BIA lo ta kapas pa enfrentá e hopi retonan ku aviashon i aeropuertonan mundialmente ta konfrontá aktualmente. E Hunta lo sigui hasi esfuerso pa fortifiká strukturalmente e organisashon di BIA.