CARACAS- Segun e korant benesolano ‘Diario La Verdad de Vargas’ e presidente di Venesuela Nicolas Maduro riba djasabra a duna di konosé ku e lo ta dispuesto di bende no solamente petroli, pero tambe gas natural ku Merka.

“Nos ta kla pa bende petroli i gas natural ku Merka, ya ku na mi opinion no mester brua asuntunan ekonómiko ku esnan polítiko”, asina Maduro a bisa.

E komentarionan di Maduro ta interesante, konsiderando ku en general e ta un aliado di Rusia i tin hopi tenshon entre Merka i Venesuela. Venesuela mes tamba ta sufriendo bou di basta sankshon mundial i spesialmente Merka, pa motibu di hopi aktitut anti-demokrátiko na nos pais besino.

Subida di prèis

No por mira e komentarionan di Maduro lòs for di e situashon di krisis ku invashon di Ukrania dor di Russia. E invashon a pone ku prèis di petroli, gasolin i gas natural a subi drástikamente den e último 10 dianan tras di lomba.

Partikularmente Europa ta dependé pa un gran parti di gas natural importá for di Rusia. Un pais manera Alemania ta importá masomenos 52% di tur su gas for di Russia. Algu ku e país no ta dispuesto di sigui hasi den lus di agreshon di Russia kontra pais besino Ukrania.