Kralendijk- E grupo Mangrove Maniacs siman pasá a planta 200 pal’i mangel na kosta sùit di Boneiru. E inisiativa pa planta e pal’i mangelnan di e sorto ‘red mangrove’ ta forma parti di un kampaña mundial pa planta mas pal’i mangel.

Pal’i mangel, òf mangrove, manera ta yama nan internashonalmente, ta hunga un ròl sumamente importante den protekshon di nos kostanan. Pa di promé pa evita eroshon, pero tambe pasombra nan ta fungi komo un área kaminda hopi piska ta nase.

Mundialmente pal’i mangel nan ta bou di preshon dor di desaroyo ku ta tumanda lugá den áreanan di kosta i kaminda ta kap e palu nan aki pa konstruí hotèl òf playanan artifisial.