Kralendijk- Mas ku 80 hende na tur a traha lunanan largu riba preparashon i finalmente grabashon nobo di e himno di Boneiru.

Por bisa ku e proyekto ta unu ku a haña sosten di ámbos hende hoben i hende mas grandi riba nos isla. Esaki a sali na kla durante un konferensia di diputado Nina den Heyer, pa papia tokante e Dia di Boneiru benidero, pero mas importante tokante e grabashon nobo di nos himno.

E asuntu di grabashon a tuma un buèlta kaminda hopi hende a kritiká e inisiativa, sin ta desponé di tur e informashon korekto.

Orkesta i kor

Den kuadro di e proyekto un orkesta kompleto a toka e muzik di e himno, i kor di hende lokal a graba e parti kantá di ‘Tera di Solo i suave bientu’.

Diputado Den Heyer a bisa di ta komprondé ku ora hende tende e suma di 44.000 dòler ku e proyekto a kosta, hende por reakshoná ku desgustu. “Klaro ku esaki ta hopi sèn, pero nos ta kere ku ta algu di importansia”. Den Heyer a splika ku hopi biaha ta bisa ku nos tin ku traha riba nos identidat komo Boneriano, pero ku himno ta forma un parti importante di esaki, meskos ku ta e kaso ku nos idioma.

Ars Cantandi

Yùfrou Yeta Rosario tambe tabata ta presente pa a duna mas splikashon tokante e proyekto. Remarkabel ta ku ámbos yùfrou Yeta i Henri Toré tur dos tabata envolví den grabamentu original di e himno na aña 1976 komo parti di Ars Cantandi i awor nan ta enbolbí tambe den e selekshon i guia di esnan ku a kanta e himno pa e grabashon nobo.

“E ta algu bon. E ta algu bunita, e ta algu ku tabata nesesario pa nos isla, despues di mas ku 40 aña asina Rosario” a bisa.

Jose Martis

E hóben Boneriano Jose ‘Ito’ Martis, ku a inisiá e proyekto a duna e resumen di kon e proyekto a kuminsá i kon a yega asinal leu. Martis ku den pasado a representá Boneiru den ekstior komo deportista, a bisa for di e tempu ei ela keda emoshoná ora ela tende nos himno. “Pero despues mi a kuminsá eksperimentá ku e sonido pa wak kon e himno lo por skucha den tempu di awor i ku teknologia di awor”, asina Martis a splika.

Ora Martis a laga otro hende skucha su ideanan, tur a keda entusiasmá. Asina ela aserká BC, ku tambe tabata entusiasmá i kaminda Nina den Heyer, komo diputado di Kultura, a pones su mes tras di e proyekto.

Den Heyer a klousurá bisando ku e ta keda para firme tras di e proyekto. “Mi sa ku tin krítika tambe aki aya, pero mi ta keda 100% pará tras di e inisiativa aki i mi ta spera ku nan final, tur hende na Boneiru lo por ta orguyoso di e grabashon aktualisá di e himno.