KRALENDIJK – Faltando ménos ku un luna mas pa elekson pa konseho insular un tersera parti di votadó na Boneiru no sa ainda riba kua partido nan ta bai vota. Esaki ta resultado di un enkuesta ku ABC Online Media a tene den kolaborashon ku e ofisina di konseho Linkels & Partners.

E grupo grandi di votadónan indesiso ta bini kla dilanti den mas ku 100 entrevista kara-ku-kara ku entrevistadónan di Linkels & Partners a hasi den e último dianan. Di e personanan entrevistá 35,7% ta bisa di ta duda ainda riba kua partido nan ta bai vota.

Di e partidonan tradishonal MPB tin mas molèster di votadónan indesiso. Relativamente hopi partisipante ku a duna di konosé ku nan a vota pa e partido blou na 2019, ta duda si nan ta bolbe vota pa e partido ei e aña aki. Ounke nan no ta deskartá esei tampoko.

Komplemento

A tene e enkuesta komo komplemento riba un Online Poll di ABC Online Media, ku kasi 500 persona a yena. Mayoria votadó ku a vota na 2019 pa UPB òf pa Partido Demokrat ta duna di konosé ku nan lo bolbe hasi esei awor.

Den e enkuestanan personal tambe Partido Demokrat ta bini dilanti komo favorito. Sinembargo e diferensianan ku UPB i M21 ta mas chikitu ku loke ta e kaso serka e Online Poll. Partikularmente UPB i M21 ta parse di no ta sufisientemente representá  den e Online Poll. Ámbos partido  ta sali  konsiderablemente mas fuerte den e enkuestanan kara-ku-kara ku den e Poll.

Kouteloso

Sikólogo Harald Linkels, ku a organisá tantu e Online Poll komo e enkuesta, ta ripití ku mester ta kouteloso ku e interpretashon di e resultadonan di e investigashon. “Na e Online Poll  e chèns di manipulashon ta mas grandi i no por kontrolá ken ta yena esaki. Si nos a ripará ku hendenan ta konsiderablemente mas liber pa motivá nan eskoho òf preferensia den e Online Poll. Na e enkuestanan personal e personanan ku ta entrevistá ta parse di tin mas problema pa ekspresá nan preferensia i e motivashon ta mas limitá”. Segun Linkels e punto fuerte di e enkuestanan personal ta e echo ku a skohe e personanan ku ta entrevistá kompletamente arbitrario, di manera ku e sifranan ta mas konfiabel ku esunnan di e Online Poll. No opstante e mas ku 100 personanan ku a entrevistá ta trata di un sondeo relativamente chikitu di e total di personanan ku por vota.

Preferensia 

E motivashon di voto ta variá, pero no ta tur ora basá riba un base ophetivo. “Mi yu ta riba lista, p’esei mi ta vota MPB”, un persona femenino ku a entrevistá ta bisa e entrevistadó. Un otro persona ta indiká ku su famia ‘semper a vota UPB’ i lo hasi esei tambe durante e elekshon benidero.

Loke tambe ta remakabel ta ku ta asosiá e kuater partidonan eksistente ku diferente asunto. Di PDB ta spera ku nan lo kambia e rumbo di e gobièrnu lokal. “Clark (Abraham, ku ta kabesante di lista pa PDB, red) sa kiko ta biba bou di pueblo”, hopi persona ku a entrevistá ta bisa. Ta tende zonidonan similar komo motivashon pa vota pa partido M21 ku Daisy Coffie komo kabesante di lista. “E ta bisa kosnan ku otronan no ta bisa” i “E ta lucha pa kambio”.

Serka votadónan di UPB tin hopi apresio pa e trabou di James Kroon. “Kroon tin eksperensia”, ta un motivashon hopi skuchá pa un voto riba UPB. Tambe hopi votadó pa UPB ta haña ku James a kumpli ku su promesanan di elekshon, sin duna mas hustifikashon. Un minoria a remarká ku durante e último periodo di gobernashon a asfaltá kareteranan.

Hasi negoshi

Ta asosiá MPB i pa ta mas eksakto e kabesante di lista, Hennyson Thielman, ku un aktitut empresarial. “E ke hasi negoshi”, un persona ku a entrevistá ta bisa. Otronan ta remarká ku Thielman ta hóben i dinámiko, ‘Kontinuidat di maneho’ ta un otro motivashon ku a bini hopi dilanti pa vota awor atrobe riba MPB.

E partidonan chikitu, Lista Suzy Thode i 1 Union pa Pueblo apenas tin peso. No a menshoná Lista Suzy Thodé ni un biaha komo un partido ku e personanan ku a entrevistá lo vota riba dje, tantu na e Online Poll komo na e entrevistanan kara-ku-kara. Den e Online Poll, un minoria a menshoná 1 Union pa Pueblo, pero den e enkuestanan personal no a menshoná e partido ni un biaha komo e partido di eskoho. Na tur ménos ku 1% di tur persona entrevistá ta duna di konosé di lo vota riba 1 Union pa Pueblo, mientras esei ta 0% serka Lista Suzy Thodé.