Èxtra: Fundashon Interesnan di Konsumidó na Kòrsou: outomobilistanan mester haña akseso kompleto den rapòrt di Forensys

E fundashon ta haña desenas di keho di aseguradonan durante i despues di tratamentu di demanda di daño na Kòrsou. Nan ta bisa ku ta opstruí nan trabou, pasobra Forensys no ta kompartí ni sikiera informashon básiko di e kontra partido, manera nòmber i adrès. Ku esaki ta bira práktikamente imposibel  pa defendé bo derechi.

Fundashon Interesnan di Konsumidó na Kòrsou ta enfatisá e interes di aseguradonan pa tin akseso kompleto den e rapòrt di Forensys. Asina un asegurado, den kasonan di daño okashoná pa un uzadó di kaminda ku no ta sigurá, no por kuminsá un prosedura sivil, pasobra Forensys ta nenga di suministrá dato.

E fundashon a eksperensiá na diferente okashon kon Forensys ta skonde tras di e lei di privasidat i ta nenga di fasilitá rapòrtnan di aksidente kompleto na aseguradonan, kaminda ta mand’é pa e kompanianan di seguro di klientenan, loke ta kondusí na mas komplikashon.

Antilliaans Dagblad: Ainda reinan largu di espera na CMC 

Sentro Médiko di Kòrsou (CMC) ta konfrontá ainda reinan largu di espera pa operashonnan, spesialmente riba departamentunan di ortopedia i oftalmologia.

Ortopedia ta trata problemanan ku e mekanismo di moveshon: wesu-, skarnir-, spir-, kabuyanan di múskulo. Siruhanonan ortopédiko ta trata korekshon di herida- òf afekshonnan di e skeleta i múskulo- i skarnirnan relatá na e skeleta.

Na luna di dezèmber 2023 tabatin 636 pashènt riba e lista di espera pa un intervenshon ortopédiko i 500 pa un operashon di wowo. Ounke e kantidatnan aki ta mustra un bahada kompará ku òktober 2023, e listanan di espera ta keda largu.

Otro departamentunan ku lista di espera largu ta neurosirugia, urologia, dòkter di garganta, nanishi i orea (KNO), sirugia general, ginekologia i sirugia plástiko.

Banda di esei e listanan di espera pa tratamentunan poliklínika manera kardiologia i oftamologia ta largu.

Antilliaans Dagblad: Aeropuerto di Aruba 

Aeropuerto di Aruba tabata será ayera mainta pa motibu di un sistema di fria malu, loke a kondusí na temperaturanan peligroso  i  flurnan ku ta slep den e terminal.

El a keda será te mèrdia, loke a pèrkurá pa retraso den buelonan ku ta yega i ku ta sali i mester a kambia ruta di sierto buelonan.

E aeropuerto a ofresé e pasaheronan, ku a sufri daño di esaki, akomodashon i fasilidatnan den Hyatt Place.

A kaba ku e reparashonnan ku a kuminsá kuné e anochi promé te 11.15 numa. Aruba Airport Authority (AAA) lo evaluá e trabounan di reparashon i a ofresé su diskulpa pa e inkonvenensia.

Antilliaans Dagblad, Èxtra i Vigilante: Ola di grip na Kòrsou

Desde  final di 2023 Influenza A a dal duru na Kòrsou, ku hopi kontaminashon i hospitalisashon komo konsekuensia, AD ta bisa. Èxtra sinembargo ta skirbi: ku tin un tendensia ku e ta bahando i ku e kasonan di influenza ta birando normal.

Apesar ku ta dominá e situashon, Melissa Arias di ministerio di Salú, Medio Ambiente i Naturalesa (GMN) ta konsehá pa bisti tapaboka i sigui reglanan di higiena, spesialmente ku e aktividatnan karnavalesko na kaminda.

Vírùsnan di grip, inkluso Influenza A, ta asotá kada fin di aña. Influenza A ta okashoná kehonan serio, spesialmente serka hendenan ku tin un riesgo di salú haltu. Tabatin puntonan kulminante den hospitalizashon i Covid-19 tambe ta keda un punto di atenshon.

Aki ta sigui un resúmen di e sifranan mas importante ku ta menshoná den e anunsio:

• Hospitalisashon Influenza A den CMC (Curaçao Medical Center):
  • Puntonan kulminante riba 3 di yanüari: 30 persona
  • Puntonan kulminante riba 9 di yanüari: 29 persona
• Resultadonan di tèst di Influenza (Promé dos simannan di yanüari):
  • Total persona ku a tèst pa influenza: 165
  • Total persona ku a tèst positivo pa Influenza A: 65
  • Total persona ku a tèst positivo pa Influenza B: 0 (niun hende)
• Otro kasonan médiko (Promé mitar di yanüari):
  • Pashèntnan ku infekshon agudo di vianan respiratorio: 43
  • Personanan ku keintura: 33
  • Personanan ku bronkítis agudo: 19
  • Personan ku fèrkout gewon: 25
• Situashon di Covid-19 den CMC:
  • Kantidat di pashènt hospitalisá ku Covid-19 te ku djamars último: 7
  • Kantidat di pashènt ku Covid-19 den hòspital for di komienso di yanüari: 10

E Huisartsenpost (HAP) nobo nobo na CMC a atendé 2367 pashènt den e promé dos simannan despues di su apertura, i di kua alrededor di seis porshento tabatin simptomanan di grip.

Èxtra: E organisashon “Bos di Hubentut” a lansa un kampaña pa prevenshon di abusu 

Ayera Fundashon Bos di Hubentut a lansa e kampaña ‘Ku Ki Derechi” pa konsientisashon i prevenshon di abusu. E meta ta pa hasi komunidat konsiente di abusu en general, i abusu seksual en partikular, pa por prevení esaki.

Minister Ruthmilda Larmonie-Cecilia ta sostené e kampaña i ta hasi un yamada riba komunidat pa tuma akshon pa un komunidat liber di violensia i abusu.

A renobá e kampaña, ku anteriormente tabata eksitoso, ku avisonan den kuater idioma dirigí riba televishon, radio, korant i media sosial.

Durante aña Bos di Hubentut ta organisá charla- i tayernan i un dokumental edukativo.

Luna di aprel ta bira ‘Blue Month’ kontra abusu di mucha, ku aktividatnan i un konferensia pa hóbennan.

Èxtra: Fly-in na Hato ta tuma lugá mañanE Fly-In ku originalmente mester a bini Kòrsou 14 di yanüari, lo yega mañan, djasabra. E ora eksakto di yegada na Kòrsou no ta konosí ainda. E karchinan pa e aktividat aki, ku “Ultimate Caribbean Journey January 2024″ ta organisá, kaminda pilotnan di avionnan privá lo a sali 14 di yanüari for di Merka, a kaba. Kòrsou lo tabata nan promé parada.

Pa motibu di reglanan di Outoridat di Aviashon Sivil di Kòrsou i retrasonan pa motibu di e pandemia di Covid, a entregá e plan di buelo di e grupo di pilotonan privá di Merka lat i Kòrsou a rechas’é. Pa laga Kòrsou keda tòg den e programa e organisadó Air Journey a bòltu e plan pa e Tour Karibense, kuminsando for di e final bai e komienso. Esei ta nifiká ku e último pais ku lo a bishitá ta risibí awor e promé bishita.

E avionnan di Air Journey Fly-in lo pasa via Canouan, un di e islanan di Grenada i Grenadines, pa bini Kòrsou. E tour ta konsistí di sinku avion ku turbina ku por bula distanshanan largu i rápido. Ta spera ku tur kos ta bai bon i ku e bishitantenan di Kòrsou lo gosa, di manera ku por plania mas biahe pa Kòrsou.

Amantenan di aviashon por bishitá e website www.airjourney.com. E avionnan ta planiá pa yega Kòrsou den oranan di mèrdia.

Vigilante: Protekshon di Bestia, GMN i otro stakeholder trahando riba maneho pa kachó riba kaya 

Riba 20 di febrüari GMN i otro personanan interesá ta bini huntu pa desaroyá un plan pa atendé ku kachónan riba kaya. Maria Luisa Garcia, presidente di Protekshon di Bestia, ta konfirmá ku gobièrnu ta trahando riba un solushon, pero ku no tin un plan konkreto ainda.

Tabatin diferente enkuentro relashoná ku e problema aki. Posiblemente e plan lo konsistí di un aserkamentu integral, inkluso sterilisashon masal i kita kachónan for di kaya, pero no ta kla ainda kiko e stapnan spesífiko lo ta.

Presidente di Protekshon di Bestia ta enfatisá ku e problema di kachónan di kaya ta grandi pasobra polis ta haña diferente yamada di siudadanonan ku kachónan ta morde.

E problema ta haña mas atenshon, pero no ta kla ainda kon e aserkamentu lo ta, segun Maria Luisa garcia.

Ora ku a puntra Maria Luisa Garcia si e solushon di sterilisashon i pone e kachónan bèk riba kaya lo yuda, e presidente a duna di konosé ku e situashon ta keda konfuso na momento ku no ta adoptá e kachónan ku a sterilisá, pero simplemente pone nan bèk riba kaya.