Antilliaans Dadblad: No pone tur énfasis riba turismo so

No mester mira turismo internashonal komo úniko fuente di entrada pa balansa di pago pa Kòrsou i Sint Maarten. Esaki ta e nukleo di un presentashon ku e ekonomistanan Shekinah Dare i Christopher Rigaud di Banko Sentral di Kòrsou i Sint Maarten (CBCS) a tene durante un simposio. Nan ta enfatisá e nesesidat di un kresementu ekonómiko balansá, kaminda ta desaroyá otro sektornan tambe banda di turismo.

Pa Kòrsou ta remarkabel ku na 2005 dunamentu di servisio profeshonal finansiero ku un kontribushon di 6,1 porshento tabata ainda e sektor mas importante. Despues di algun fluktuashon e kontribushon aki tabata solamente 1,9 porshento na 2019. Kontribushon di turismo sinembargo a subi  den e periodo ei di 3,5 pa 12,1 porshento. Dare i Rigaud ta mustra riba e importansia di diversifikashon.

Nan ta indiká ku turismo ta kontribuí positivamente na kresemente ekonómiko i kupo di trabou, pero ku e tin desbentaha tambe manera dependensia  i e riesgo di eskases den komersio di merkansia.

Tur matutino ta komentá e aktividatnan karnavalesko di wikènt ku a pasa

Den Antilliaans Dagblad nos ta lesa ku tabatin dos elekshon den e kategoria adulto, tiner i mucha. Nan a gana hopi premio manera un estadia na Aruba, chèknan di bank i premionan kèsh i tambe un biahe pa Venezuela. E elekshonnan a bai akompañá pa un show karnavalesko grand i aktuashonnan.  E ganadónan ta haña un lugá prominente den e paradanan.

Èxtra ta menshoná nòmber di e embahadónan di karnaval: Rei i Reina Tiner 2024 ta Tyrese Candelaria i Dianthely Pourier; Prens i Pancho tiner 2024 ta Cherrel Girigorie i Zyan Diaoen i nos Reina Hubenil 2024 ta Dazaynah Libiee.  Prens i Pancho grandi ta Irvanrig Leito i Dievenier Hamen i Reina di Karnaval  grandi ta Jesmelys Zink Angelista.

E siman aki ta siman di  Festival di Tumba 2024 i Èkstra ta deseá éksito na tur tumbero.

Antilliaans Dagblad: Pasport ta bira mas karu

Komo konsekuensia di korekshon di inflashon i adaptashon di tipo di kambio tarifanan pa pasport ta subi entrante 1 di yanüari 2024 na Kòrsou i islanan BES.

Pa adulto e preis na Kòrsou ta subi di 85 pa 92 florin i pa menor di edat di 48 pa 52 florin. Na islanan BES e tarifa ta subi respektivamente di 123,49 pa 134,79 USD pa adulto i di 102,88 pa 112,47 USD pa mucha.

E adaptashon aki ta parti di un medida general di gobièrnu di reino, ku ta tene kuenta tambe ku medidanan pa rònt e sèn den desena den florin Antiano (ANG) i florin Arubano (AWG), spesialmente pa motibu di eskases di sèn largá na Sint Maarten. Asina ta tene e tarifanan na Sint Maarten, Aruba i Kòrsou pareu. E maneho ta na vigor for di 2017 pa garantisá konsistensia entre e islanan.

Pa basta tempu kòntròlnan di higiena ta kousa di iritashon serka empresarionan

Èxtra ta habri siman ku e bombòshi tokante seramentu e fin di siman aki di Greenhouse na Rooseveltweg. Den un artíkulo empresarionan ta keha tokante kontrolnan di inspekshon ku ta tumando lugá.

Ya pa basta tempu e kontrolnan di higiena na Kòrsou, spesialmente den horeca, ta un fuente di iritashon pa doñonan di empresa. E frustrashon aki a yega su kulminashon despues ku a sera restorant Greenhouse. Doñonan di empresa ta keha tokante e manera inesesariamente sorpresivo i tin biaha manipulativo ku ta ehekutá e kontrolnan i ku ta kondusí na siere inhustu i daño na reputashon di empresanan.

Den un enkuentro ku minister Ruisandro Cijntje a enfatisá e nesesidat di kambio den atendé ku kontrolnan. Tambe tin krítika riba e inkonsistensia i e manera segun kièr di e reglanan ku “Technische Higiënische Zorg” (THZ) di ministerio di GMN ta apliká. E reglanan ta kambia hopi baiha, di manera ku loke promé tabata akseptabel, diripiente por ta motibu pa duna atvertensia òf sera e lugá.

Komo reakshon riba e situashon aki minister di GMN, Javier Silvania, a anunsiá un protokòl di kontrol nobo ku lo implementá dentro di un luna despues di konsultá ku e partidonan relevante. Intenshon di e protokòl ta pa standarisá e proseduranan i mehorá e koperashon entre e diferente ministerio- i instanshanan.

‘HUNTU FUERTE NA ORA DI DEMENSIA’

Den Antilliaans Dagblad baidónan di kongres ta bisa ku kuido na Kòrsou mester drecha.

Durante e kongreso ‘Samen naar een dementievriendelijk Bonaire’, organisá pa Fundashon Alzheimer Bonaire (FAB) den koperashon ku Alzheimer Nederland, investigadónan i dunadónan di kuido di e islanan Hulandes Karibense ke bai traha huntu pa drecha e sistemanan di kuido lokal i adaptá nan na e nesesidatnan kresiente di nan poblashonnan ku ta embehesiendo. 

A pone énfasis riba e nesesidat pa koperashon entre e seis islanan di Hulanda Karibense pa drecha kuido pa demensia. Kompará ku Boneiru, e kuido na Kòrsou ta kana atras  apesar di e esfuersonan 

Investigadónan Van Heijningen i Thoonen entre otro a enfatisá e urgensia pa pone kuido di demensia riba agènda polítiko. Tin eskases di sifranan konkreto tokante demensia na Kòrsou.

Tambe e kongreso a enfatisá e nesesidat di inovashon den kuido. A elogiá organisashonnan manera Fundashon Alzheimer Bonaire i Stichting Mantelzorg Bonaire pa nan trabou impreshonanate den kuido na hendenan grandi ku demensia.