DEN HAAG – Un mayoria den parlamento hulandés ta buskando establesé un mínimo sosial na Boneiru, St. Eustatius i Saba na 2024. 

Esaki ta resultado di un enmienda presentá pa Don Ceder i Jorien Wuite ku ta konsehá un oumento den salario mínimo i ayudo sosial na e islanan. E Komishon Thodé a presenta su konklushonnan ku e salario mínimo i ayudo sosialnan ta muchu abou pa por biba riba e islanan BES, i un di tres di e habitantenan di e islanan ta biba bou di salario mínimo òf ku un ayudo sosial insufisiente. 

E komishon ta urgí pa pone un fin na e problema aki i enfatisá ku no por tin mas retraso den e establesimentu di un mínimo sosial adekua na e islanan BES.

Baha gastu

Tambe e kominshon ta pro pa sigui buska manera pa no solamente subi entrada di esnan ménos pudiente, pero tambe pa baha gastunan importante, manera pa transporte, awa i koriente i otro kosnan k uta impaktá pobreza.