WILLEMSTAD – Mas ku mitar di kantidat di mayor na Kòrsou ta paga sèn pa guia profeshonal di tarea di kas pa nan yu. Ta paga un averahe di 291 florin, ku ta varia di sero te 1100 florin. Esaki ta resultado di un investigashon ku Universidat di Kòrsou a tene bou di 1150 mayor ku tin minimal un yu den enseñansa di fundeshi na Kòrsou.

E resultadonan ta mustra ku mayornan ta dediká hopi tempu na guia di nan yu(nan) ku trahamentu di tarea di kas òf prepará pa pruebanan.

Mayornan ta guia nan yu(nan) un averahe di dos ora pa dia ku tarea di kas. Ora a midi esei pa siman a resultá ku mayornan, ku a akudí serka guia pa tarea di kas, nan mes tambe ta duna kasi djestres ora di guia ku tarea di kas. Mayornan ku no tin guia pa tarea di kas ta dediká nan mes mas ku 18 ora na esei.

Ademas mas ku mitar di e kantidat di mayor ta indiká ku mas hende den famia ta yuda ku guia di tarea di kas, di moda ku e kantidat di ora di guia pa siman pa mucha probablemente ta mas haltu, segun e investigadónan.

Strès

Ademas a resultá ku e gran kantidat di tempu ku mayornan ta dediká na guia di nan yu(nan), sin importá si nan a embolbí guia di tarea di kas profeshonal òf nò, ta parse di tin un efekto negativo riba e bienestar di e mayornan. Mayornan ta raportá un averahe relativamente haltu di nivel di strès i kansansio a konsekuensia di e eksigensianan ku skol ta pone.

Tambe un parti konsiderabel di e mayornan ku ta partisipá ta raportá ku e guia di nan yu(nan) tin efekto tambe riba nan bida privá komo konsekuensia di e eksigensianan ku skol ta pone. Un di seis mayor asta ta duna di konosé ku e guia di enseñansa ku nan ta duna nan yu(nan), tin un efekto negativo riba nan trabou.

Deprimí

Mas ku un kuart di e mayornan ta indiká ku nan yu(nan) ta sinti su(nan) mes deprimí òf no ta entamá aktividatnan plasentero mas a konsekuensia di e trabou ku tin ku hasi pa skol. Esaki por tin komo konsekuensia ku e alumnonan ta ménos motivá pa skol i ta oumentá e chèns pa drop-out, segun e investigadónan .

Mas aleu un kuart di e mayornan ta indiká ku komo konsekuensia di e medidanan post corona nan ta ménos bon na altura di e prestashonnnan di nan yu(nan) na skol i ku na ta haña mas difísil pa tuma akshon na momentu ku nan yu(nan) tin difikultat ku algu.

Por último, e sifra promedio pa e sistema eskolar ta solamente un 5.6, kaminda e sifra mas komun ta un 5. Ta krea e imáhen serka un gran parti di e mayornan ku e partisipashon ku skol ta pidi no ta salú mas,  den sentido ku e ta okashoná strès, kansansio i un bienestar disminuí di mayor i yu.

Rekomendashonnan

Segun e investigadónan ta prudente ku skolnan ta revisá nan kuríkulo krítiko. Pakiko e alumnonan mester hasi ainda asina hopi na kas? Esei realmente ta nesesario?

Por ta ku skolnan ta haña tur materia mésun importante, di manera ku pa kada materia ta duna relativamente hopi tarea di kas.

Na di dos lugá skolnan mester duna tarea di kas kualitativamente mihó. ‘Mas tarea di skol òf kas’ no nesesariamente mester ta mihó. Lo ta mas ideal si skolnan duna e alumnonan ménos, pero kualitativamente mihó tarea di kas.

Tarea di kas kualitativamente bon ta tarea di kas ku ta yuda mas efisiente posibel pa realisá metanan di siñansa spesífiko. Por skrap tarea di kas ku no ta sirbi un meta di siñansa konkreto.

Tarea di kas ku por sierto ta kuadra ku un meta di siñansa konkreto, pero ku ta muchu di rèk òf ta kosta hopi tempu desproporsional, mester hink’é den un forma di traha ku ta hopi  mas kòrtiko i ku ta yuda realisá e meta di siñansa mas fuerte.

Komo di tres punto e investigadónan ta indiká pa siña e alumnonan kon nan mes por regulá nan siñansa. Esaki ta nifiká ku un alumno mes por kanalisá su propio siñansa den bon direkshon, por evaluá, redirigí i sa di motivá su mes pa siña.

Na di kuater lugá skolnan por sostené mayornan. Nan no tin tur ora e konosementu of abilidatnan pa guia un mucha óptimal ku e tarea di kas. Segun e investigadónan skolnan no mester sali outomátikamente for di e punto di bista ku esaki ta e kaso.