KRALENDIJK- Djaweps Radio Mega Hit FM a ofisialisá nan studio nobo situá na Club Trocadero Bonaire. Despues di un temporada di trabou duru, a logra pone tur aparato den e edifisio i awor nan ta den aire direktamente for di Sentro di Siudat, na Club Trocadero Bonaire. 

Meta di e kolaborashon Mega Hit FM i Club Trocadero Bonaire ta, pa na momentu tin presentashon di DJ òf bandanan na e Club, Mega Hit FM ta bai live ku nan. Ron Gijzen di Mega Hit FM a bisa for di aña pasá e pregunta a bin pa Mega Hit FM bin ku un studio na e Club.

“Nos deseo tabata pa sinta kaminda tin hende, moveshon i aktividat. Awor nos a logra e paso aki. Sigur e ta nifiká hopi pa nos Radio. Mi ta gradisí gerente di e Club, ku a pèrkurá pa e fasilidat ta stabil. Aparte di tin un studio na e Club aki, nos ta mantené e studio na, kaminda tur hende konosé nos banda di Vos di Boneiru. Ta bai atendé programa na e radio for di ámbos sitio. Ta dependé e momentu i e programa.”

Durante e atardi, a papia Ron Gijzen, Ferry Maat i Cas de Ruiter. Despues a tuma lugá e kòrtamentu di sinta, ku tabata na enkargo di Ferry Maat, e Radio Icoon Mister Soul Show. Invitadonan tabatin oportunidat pa drenta e studio nobo.