WILLEMSTAD – Shalten Hato no tin idea di kòrta den overtaim pa personal di polis. Esei minister di Hustisia a informá durante e ‘ora di pregunta’ den parlamento.

Segun Hato su ministerio tin un presupuesto, di manera ku no tin kuenta di kòrta. E tim di maneho di e Kuerpo Polisial, KPC, tin e enkargo pa no surpasá e djeskuater mion.

Aña pasá a paga mas ku seis mion florin, mientras ku apenas a presupuestá djestres mion. Ta parse pues ku awor ta kòrta den overtaim, pero esei no ta e kaso. Al kontrario Hato ta bisa: ta papia di un oumento presupuestario di 1,2 mion florin e aña aki pa 14 mion pa overtaim.

Maneho di kuerpo polisial a indiká basta tempu kaba ku e situashon tin influensiá riba e bienestar sosial, familiar i di salú di e agentenan polisial, mirando e kantidat di ora ku nan ta traha.

Tin agente ku ta traha pa luna entre 125 i 250 ora na overtaim, lokual ta hopi preokupante. Nan ta traha e oranan èkstra aki banda di e oranan normal mensual di 160 ora.

Tim di maneho di KPC ke yega na un situashon ku mas ku 100 ora di overtaim no ta deseabel pa e bienestar general di e agente. Pero pa hopi agente e entrada èkstra aki ta bonbiní, di manera ku nan no ke distansiá boluntariamente di overtaim.

Pa tene e situashon manehabel den futuro, e Servisio di Kòntròl di gobièrnu a hasi un investigashon di e fenómeno trabou-overtaim na KPC. E resultadonan no a drenta ainda.