WILLEMSTAD – Renox Calmes di e Partido di oposishon Trabou pa Kòrsou a akudí na Ministerio Públiko. E ke pa hasi investigashon riba inisiativa propio riba e falsifikashonnan na Caribbean Petroleum Refinery. 

Promé minister Pisas i e direktor di Refineria di Kòrsou Patrick Newton a konfirmá esakinan. Calmes ke awor un investigashon di echonan òf un investigashon penal.

Ta trata entre otro di un karta for di luna di òktober di aña pasá kaminda a duna garantianan di finansiamentu pa eksplotashon di refineria Isla i Bullenbaai.

Calmes ta rabiá, pasobra el a pidi  e dokumentonan den Parlamento, pero no a haña esakinan pa motibu di un akuerdo di konfiabilidat entre e partidonan.

E parlamentario ta konstatá ku na e momento aki ni e promé minister ni e direktor di RdK a hasi denunsia.

“Mientras ku nan ta disponé si di e dokumentunan falsifiká. Pues na momentu ku kometé un echo kastigabel na Kòrsou i ta menasá ku un demanda, niun hende ta hasi algu. Esaki ta e mensahe ku nos ke duna invershonistanan?” segun Calmes ta bisa den su karta.