KRALENDIJK – Protekshon optimal di privasidat di abitantenan di Boneiru, Sint Eustatius i Saba ku ta hasi notifikashon di diskriminashon. Esei ta e esensia di un desishon di Ministerio di Asuntunan Interno i Relashonnan den Reino ku ta bai den konsulta. Esaki ta nifiká ku tur hende ku ke yuda pensa tokante esaki, por duna su opinion. Por hasi esaki riba e wèpsait aki te ku 15 di òktober 2024, tantu na hulandes, ingles, komo na papiamentu: www.internetconsultatie.nl/persoonsgegevensbes .

E intenshon di e desishon aki ta pa duna abitantenan di Hulanda Karibense klaridat tokante kua dato personal por elaborá, na ken por suministrá nan, i pa kuantu tempu por warda nan.

Minister Uitermark (Asuntunan Interno i Relashonnan den Reino): ‘’Trato igual ta un derecho fundamental  i ta hopi importante pa e leinan tokante trato igual tambe bira aplikabel na Boneiru, Sint Eustatius, i Saba. Ademas, nos mester sòru pa protekshon optimal di privasidat di hende ku ta hasi notifikashon tokante diskriminashon. Di moda ku tur hende por sinti nan seif pa hasi un notifikashon asina.’’

Sekretario di Estado Zsolt Szabó (Digitalisashon i Relashonnan den Reino): “Dor di sòru pa protekshon di privasidat di e siudadanonan na Boneiru, Sint Eustatius i Saba, mi ta spera ku e abitantenan di e islanan aki tambe lo hañ’é mas fásil pa mèldu esaki ora nan ta eksperensiá diskriminashon. Mi ta spera ku e hendenan lo hasi bon uso di e oportunidat pa yuda pensa kon nos por regla esaki mas mihó posibel.”

Mihó protekshon kontra diskriminashon

E gabinete ta traha riba un proposishon di lei tokante legislashon di trato igual na Hulanda Karibense. E desishon aki ta un parti di esei.

Dor di legislashon di trato igual, abitante di Boneiru, Sint Eustatius i Saba ku ta sinti su mes diskriminá pa kualke motibu (género, edat, desendensia, religion, hèndikèp, orientashon seksual, etc.) por hasi un apelashon riba e regulashonnan anti-diskriminatorio. Tambe, e abitantenan por hasi un notifikashon serka un fasilidat anti-diskriminatorio nobo, i einan pidi ayudo i konseho grátis. Kada isla ta haña un lokèt pa esaki kaminda tambe por trata ku pregunta hurídiko mas amplio. Finalmente, nan por bai serka e Kolegio pa Derecho Humano (College voor de Rechten van de Mens, pa un desishon den nan kaso.