WILLEMSTAD – Kòrsou ta pèrdè aktualmente miones pa e manera ku nos sistema di pèrmit den sektor di wega di plaka ta organisá, segun minister Javier Silvania. Segun e minister Kòrsou “ta laga miones drumi” ku e konsepto aktual kaminda tin un kantidat selektá di doñonan grandi di lisensia ku por duna un kantidat ilimitá di suplisensia.

Tabatin un kòmbersashon entre Ministerio di Finansas i e sektor di trùst na Kòrsou. E tópiko di kòmbersashon tabata restrukturashon di e maneho di wega di plaka ku ta trahando riba dje.

Leinan nobo i un outoridat nobo ku ta regulá weganan di plaka online mester ta vigente na Kòrsou fin di aña. Ta di spera ku den e promé kuartal di 2023 e maneho nobo lo drenta na vigor.

Reputashon

Despues di entre otro dokumentunan di Follow the Money i De Groene Amsterdammer/Investico/Argos, e sektor na Hulanda ta bou di interogashon ku preguntanan di Kamer di SP i ChristenUnie i deklarashonnan duru di Minister Dekker i e Outoridat di Wega di plaka.

Javier Silvania di partido den gobièrnu, MFK, tabata kla den su diskurso ku reputashon di e sektor di wega di plaka na Kòrsou mester drecha.

E minister a sigurá e presentenan ku e diferente kambionan ku tin planiá pa e sektor di wega di plaka, ta sosodé den “koperashon estrecho ku e plataforma di personanan enbolbí.”

Silvania a duna di konosé ku e mes ta bai sinta mensualmente na mesa ku esnan konserní pa ken e normanan nobo, medidanan di maneho i kambio di lei ta aplikabel. Den e anunsio di e reunion entre e minister i e sektor di trùst el a duna di konosé kaba ku e partisipashon di e ofisinanan di trùst ta di sumo importansia.

Aspekto finansiero

E minister di Kòrsou no a ámplia solamente riba e reputashon di e sektor ku segun e mester drecha, pero tambe el a ámplia riba e aspekto finansiero di e restrukturashonnan. Desde un prinsipio kaba e minister tabata bon kla ku un di e puntonan klave di e lei nobo lo ta ku un kontribushon mas grandi ta bai kaha di gobièrnu.

Segun Silvania e ofisinanan di trùst ta e berdadero doñonan di e fortuna grandi di e sektor di wega di plaka online, no e doñonan grandi di lisensia. Empresanan ku ke habri un kasino online na Kòrsou mester tin, banda di un pèrmit, tambe un empresa di buzon di Kòrsou.

E ofisinanan di trùst di Kòrsou ta manehá aproksimadamente sentenares pa miles di empresanan di buzon pa sitionan di wega di plaka, segun e minister. E doñonan ta paga e ofisina di trùst  pa aña alrededor di 22.000 euro pa kada kasino online pa hasi e  atministrashon for di Kòrsou, segun minister Silvania.

Lei di wega di plaka

Den luna di yüli Minister Franc Weerwind a reakshoná riba preguntanan di Kamer di ChristenUnie.  Den su kontesta el a duna di konosé ku e sektor di wega di plaka na Kòrsou no  ta transparente i komo tal ta forma un peliger pa merkadonan regulá manera Hulanda.

Minister Silvania ta suprayá e kontesta di su kolega Hulandes. E minister di Kòrsou ta indiká ku Franc Weerwind a hasi un deklarashon kla ku su kontesta i ku “den liñanan grandi a indiká na unda nos ta pará aktualmente.”

Pues pa kambia esaki ta trahando riba un lei di wega di plaka nobo ku lo presentá e luna aki. Segun Javier Silvania aktualmente tin inklaridat riba diferente tereno, loke ta hasi difísil pa “tuma pasonan konkreto ku kontenido.” Pero, sigur e no ta imposibel, asina e minister a remarká.

Den e sistema nobo e kasinonan online lo mester paga mas plaka direktamente na kaha di Kòrsou mediante un “sistema renobá i efisiente di derechonan di pèrmit i otro impuestonan.”