KRALENDIJK – Djamars atardi, Minister Harbers di Infrastruktura i maneho di Awa (I&W) a hiba un bishita di trabou na aeropuerto Flamingo. E minister a topa ku diferente empleado di BIA i a wòrdu guiá pa direktor Maarten Van der Scheer i e hunta di komisario kompletu. 

Na e plataforma pa buelonan entre e islanan, a papia tokante e retonan pa hasi tráfiko entre islanan mas aksesibel i sostenibel.

Minister a risibí splikashon tokante mapa di sostenibilidat di BIA, kual ta inkluí instalashon di pènelnan solar, bateria, i fasilidatnan di kargamentu pa vehíkulonan na tera i aéreo. Ku yudansa di e ministerio, e desaroyo aki por bai mas rápido, Van der Scheer a indiká, enfatisando ku tráfiko entre islanan aksesibel i sostenibel ta di gran importansia pa e habitantenan di Boneiru.

“Awe, mi a keda informá tokante tur e desaroyonan importante ku ta tuma luga na Aeropuerto Flamingo. Aviashon ta esensial pa aksesibilidat i konekshon den parti Karibe di reino nos, i tin tambe oportunidatnan grandi pa futuro aki. Ku e distanshan kòrtiku entre e islanan, ta un tereno di prueba ideal pa aviashon sostenibel di futuro, manera avionnan eléktriko. P’esaki posiblemente ta kaminda e futuro di aviashon ta kuminsá,” Harbers a bisa.

Despues, e minister a inspektá, entre otro, kondishon tékniko e lusnan di pista i e preparashonnan pa nan remplaso kompleto. E ehekushon di e proykto aki lo kuminsá pronto i lo ser supervisá pa Rijkswaterstaat. Ministerio ta ofresé un kontribushon finansiero substansial pa e kosto prosupuestá pa asina asegurá ku Boneiru kumpli ku e rekesitonan pa ku esaki. 

Plataforma

Finalmente, e minister a risibí splikashon tokante e plataforma pa avionnan mas grandi, kual lo ser renobá, ekspandé, i re-diseñá den e aña benidero. Pa esaki, e minister a firma un Memorandum di Entendimentu durante su bishita anterior na BIA na fin di 2022, prometiendo un kontribushon di 15 miyon euro na e proyekto aki. Aktualmente, e planonan aki ta ser desaroyá, i ta krea un diseño detayá.