WILLEMSTAD – Minister Javier Silvania ta para habrí pa adaptashon di e salarionan haltu di funshonarionan den tòp, pero na su turno ta eksihí transparensia i kolaborashon total di e grupo aki. E salarionan i kondishonnan di trabou mester subi mesa.

E grupo a laga sa den un karta ku nan no ta di akuerdo ku e proposishonnan di gobièrnu pa  trata e normanan di salario, e kompensashon na ora di retiru i e klóusulanan transitorio.

Mayoria ta deseá un revishon. E grupo ta haña e kálkulonan aktual desproporsional.

Minister Silvania ta bai entregá awor un nota pa kambio. A pone esei den e di kuater nota di kambio pa ordenansa nashonal di standarisashon di entradanan haltu. Ta tene kuenta si ku desishonnan di Konseho di Reino di Minsternan den kual ta pará e kondishonnan pa e di tres pago pa ayudo di likides. Banda di esei lo reevaluá e klóusula transitorio di dos aña.

Mester manda pa ministerio di Finansas tur kopia di kombenionan di trabou i kombenionan di servisio di tur funshonarionan haltu ku ta kai bou di rango di aplikashon di e ordenansa nashonal. A base di e informashon aki por haña un bista den e rekompensa total di e funshonarionan haltu.

E informashon ku ta duna mester ta sufisiente i e puntonan di atenshon mester ta sufisientemente dokumentá a base di dato i sifra. Den koperashon ku Keesen Actuarissen lo hasi e kalkulashonnan nesesario i a base di esei lo traha un konseho ku lo bira e base pa e nota di kambio.

E direktor- i mènedjernan ku tin un entrada haltu mester manda nan informashon pa mas tardá 26 di yüli 2022. Sin e informashonnan aki lo no tin kalkulo nobo di e norma di salario i e kompensashon na ora di retiru. “E trein ta sumamente lat pero lo no para’, segun Minister Silvania.