Minister Dennis Wiersma, minister di Enseñansa primaria i sekundario, a bishitá e planta di awa nobo na Hato i hiba kombersashon ku maestro i alumnonan di WEB.

Water- en Energiebedrijf Bonaire (WEB) for di 2013 ta un empresa di formashon rekonosé i tin 20 trahadó ku ta instruktornan rekonosé. Den e añanan tras di lomba, hopi stazjèr di VMBO i MBO den trayekto di BOL- òf BBL a keda eduká na WEB.

Dia 2 di yüni, minister Wiersma, huntu ku representantenan di ministerio OCW, SGB, i ROA, a hasi un bishita na WEB na e lokalidat di e planta di awa nobo. Direktor finansiero Joanne Balentien-Nicastia a duna un presentashon tokante e importansia di e alumnonan di MBO i VMBO hasi parti di nan formashon na WEB. Durante e enkuentro e minister por a sera konosí i hiba kombersashon ku e diferente instruktor i alumnonan.

Efisiente

Pa WEB guia di studiantenan ta un manera efisiente pa haña trahadonan den kas. Hopi studiante a kuminsá laborá na WEB despues di terminá nan estudio. Nan ta traha komo profeshonalnan na diferente departamentu manera departamentu di koriente, departamentu di awa i departamentu di awa di irigashon.

WEB ta bisa ku nan ta konsiente kon importante studiantenan di MBO ta pa futuro di e isla. Pa un parti dor di e kresementu enorme tin un eskases di profeshonalnan bon formá.

WEB ta bisa di ta rekonosé tambe e importansia di kolaborashon entre formashon profeshonal i sektor empresarial i komo empresa di edukashon ke kontribuí na profeshonalnan riba e isla. Nos ta gradisí minister pa su interes den nos kompania i nos trahadónan.