WILLEMSTAD – Ministerio di Finansas ta bai atendé e supervishon riba impuesto di traspaso. Kontrolaria General tabatin krítika fuerte den un investigashon tokante pago ku notarionan mester a hasi na Ontvanger di e impuesto di traspaso ku a retené.

Pa motibu di e mal supervishon gobìenu ta keda sin haña entradanan di impuesto. Banda di esei gobièrnu no ta haña entrada komo resultado di (eventual) butnan ku a duna.

Órgano di konsulta

Na luna di aprel ministerio a instalá un órgano di konsulta pa biennan inmóvil. Den e órgano tin representashon di Kadaster na un banda i Servisio di Impuesto i Domeinbeheer na otro banda.

Dentro di e órgano di konsulta aki ta trahando aktualmente pa establesé un interkambio di data entre Kadaster di un banda i Servisio di Impuesto i Domeinbeheer otro banda.

E meta ta pa yega na un sinkronisashon sólido entre e archivonan di Kadaster i e atministrashon di impuesto di biennan inmóvil (Servisio di Impuesto) i èrfpagt (Domeinbeheer) promé ku fin di aña, kaminda e registrashon di Kadaster ta e guia.

Banda di e sinkronisashon di un biaha ku registrashon di Kadaster, lo instituí pa ámbos instansha un interkambio elektróniko periódiko di kambionan, kaminda ta inkorporá outomátikamente e kambionan di Kadaster den tantu esnan di Servisio di Impuesto komo Domeinbeheer.

Portal digital 

Banda di tur esaki ta e intenshon pa establesé un portal pa notarionan kaminda por entregá aktanan elektróniko na Servisio di Impuesto i Domeinbeheer. Por kombiná e aktanan aki ku e kambionan ku a risibí di Kadaster

Na luna di sèptèmber lo kuminsá ku identifiká e eksigensianan di e portal aki pa e diferente personanan interesá. A base di e kambionan ku a risibí di Kadaster, komplementá ku e informashonnan die aktanan ku notarionan a entregá elektrónikamente, Servisio di Impuesto por determiná e impuesto di transferensia ku e notario debe  i komprobá si e notario a paga esei (na tempu).

Si e pago no ta hasí na tempu por imponé un balotashon adishonal. Pa Servisio di Impuesto esaki ta un manera di traha rápido i efisiente pa determiná e totalidat di e impuesto di traspaso.