KRALENDIJK- E ministerio di Infrastruktura i Obranan Públiko (IenW) ta neglishá 14 aña kaba pa insitituí e ‘Fondo di garantia pa Tráfiko motorisá’. Ounke ta nombra e fondo di garantia spesífiko den e ‘Lei seguro na terser vehíkulo  motorisá BES’, e artíkulonan korespondiente ainda no a drenta na vigor.

Remarkabel ta ku en general ta hustamente IenW ta tene su mes terko i irashonal pa repartishon di Tareanan di Reino i Tareanan Insular, pero den e kaso spesífiko aki no ta apliká algu ku enfátikamente ta den su man.

“Ousensia di e fondo ta nifiká ku komo víktima di tráfiko abo ta fuera di lei ora un persona sin seguro i sin sèn dal kontra bo”, un  bon konosedó di e dosié ta bisa ABC Online Media.

Un ámtenar di OLB, ku mientras tantu ta penshoná i ku a partisipá  aktivamente na e tópiko aki ta konfirmá e storia ei. “E punto krusial di e problema ta sintá den e echo ku Boneiru no konosé un registrashon di plachi di number korekto. Tanten ku esei no ta e kaso, e kompanianan di seguro riba e isla tampoko no ta koperá, pasobra nan ta mira e problema vislumbrá kaba”. P’esei introdukshon di un registrashon di plachi di number ainda riba e islanan ta nesesario, pero lo ta un tarea difísil.

E problema di shofùrnan ku no tin seguro sigur no ta algu úniko na Boneiru. Datonan di isla ruman Kòrsou ta mustra ku alrededor di 25% di e shofùrnan ta kore sin seguro. Pasobra no tin un sistema será di kompanianan di seguro, registrashon i supervisor por dura largu promé ku atrapá esun ku no tin seguro. Ora esei sosodé mayoria biaha ta muchu lat kaba, por ehèmpel si un aksidente a sosodé kaba.

Mas severo

Ounke e Kuerpo di Polis di Karibe Hulandes (KPCN) ta aktuando konsiderablemente mas severo últimamente kontra por ehèmpel shofùrnan ku ta tras di stür bou di influensia di alkohòl i ta okashoná un aksidente. Pero ainda no ta aktua òf aktua severamente kontra korementu sin reibeweis. Kontestando preguntanan di ABC Online Media kolegio ehekutivo di Boneiru a bisa di ta preukupá tambe pa e situashon.