WILLEMSTAD – 52,3 porshento di alumno den Enseñansa di Fundeshi tin molèster di deskriminashon. E porsentahe bou di alumnonan ku ta na enseñansa avansá ta 48,9 porshento.

Tentamentu ta sosodé ménos. Ta tenta 34.7 porshento di alumnonan di Enseñansa di Fundeshi, kontra 24.8 porshento na enseñansa avansá.

Esei ta resultado di un investigashon ku Universidat di Kòrsou i Universidat di Groningen a tene den kolaborashon ku Foundation Fair Educational Chance.

A hasi e investigashon bou di 739 alumno, konsistiendo di 413 alumno di enseñansa di fundeshi i 326 alumno di enseñansa avansá.

Peso 

Ta deskriminá spesialmente a base di peso. Kompará ku alumnonan den enseñansa di fundeshi, alumnonan di enseñansa avansá ta hasi menshon tambe di otro motibu pakiko ta deskriminá nan, manera pais di orígen, famia, kabei i prefensia seksual.

Ademas ta tenta òf deskriminá alumnonan di koló skur òf koló kla pa motibu di nan koló di keuru. Alumnonan ku un koló di kueru un tiki mas mesklá tin ménos molèster di esei.

Un gran parti di e víktimanan ta resultá di ta kulpabel tambe i segun e investigadónan por papia di un victim-bully cycle.

Rekomendashonnan 

E investigadónan ta sugerí pa, si e no ta eksisití ainda, desaroyá un protokòl anti-tentamentu, kumpli ku esaki i evaluá tur aña.

Esei lo kontribuí na un klima positívo kaminda e alumnonan ta sinti nan mes seif na skol.

Skolnan mester duna informashon tokante tentamentu i deskriminashon. Segun e investigadónan esnan kulpabel no ta konsiente tur ora ku nan ta tenta òf deskriminá. I tampoko no tur hende por kalkulá bon e impakto ku esaki tin.