KRALENDIJK- Segun un komunikado di prensa di parti de Entidat Públiko Boneiru (EPB) lo kuminsá kobra un impuesto riba turista, yamá Tourism Entry Levy, entrante promé di yüli di e aña aki. 

Aunke hopi hende riba su mes no ta pará negativo pa ku introdukshon di un tipo di impuesto asina, despues di debate den Konseho Insular, e montante di e impuesto ku 75 dòler pa kada bishita a bira kasi 50% mas tantu ku e proposishon di 50 dòler ku tabata riba mesa inisialmente. 

Sin embargo, e kambio mas grandi ta ku awor lo no kobra e impuesto un solo biaha pa aña, manera a indiká anteriormente, si no pa kada bes ku e bishitante drenta Boneiru. Si e drenta 4 biaha pa aña, lo e mester paga e montante di 75 dòler kada biaha. 

Di otro banda, e turista lo no mester paga ni room tax, ni carrental tax. Pa hende ku ta keda den hotel e oumentu no ta grandi. Pa hende ku ta bin keda serka amigu òf famia, si e oumento ta super impaktante. Kaminda ku antes no tabata paga nada, awor aki lo bai paga un suma basta kuantioso. 

Tarifa spesial

Sí ta asina ku habitante di un di e islanan di anterior Antia Hulandes, lo tin un tarifa spesial di 10 dòler pa kabes, pero tambe pa kada biaha ku e persona drenta. 

Studiantenan di Boneiru ku ta biba den eksterior lo ta eksonerá di e impuesto nobo aki. 

Gobièrnu ta spera ku e sistema nobo lo generá 6 mion dòler pa aña.