WILLEMSTAD – Studiantenan di Universidat di Kòrsou ta invitá públiko pa bini Universidat djadumingu awor 22 di yanüari i asisití na e Movie Madness. Lo tin presentashon di e pelíkula Uncharted, un pelíkula di akshon i aventura Merikano di 2022.

Banda di e pelíkula uncharted e públiko por partisipá na diferente wega, kaminda nan por gana premio, entre otro un pas di un dia pa Kunuku Aqua Resort.

Studiantenan di e di tres aña di e estudio ‘Business & Management’, ku ta siguiendo e ‘minor’ di Merkadeo, ta organisá e evento. E materia ‘Customer Experience Management’ ta siña e studiantenan organisá eventonan ku e kliente den mente.

E studiantenan ta spera ku e públiko ta bini Universidat masalmente, pero esun ku no por bini, por sigui e evento via e kanalnan di media sosial Instagram via @moviemadness.curacao i na Facebook via @moviemadnesscuracao.

E evento ku ta tuma lugá den oula grandi di Universidat di Kòrsou ta kuminsá djadumingu awor pa 6’or di atardi i ta dura te 10’or di anochi.