KRALENDIJK – Èks miembronan di konseho Insular pa partido di oposishon Movementu di Pueblo Boneriano (MPB), Edison Ellis i Din Domacasse, ta preokupá pa loke nan ta deskribí komo un falta di aktividat na Plantage Fontein.

E representantenan di MPB ta bisa ku entre otro na Media Sosial por wak ku e área ta será i ku no tin ningun trabou ta tumando lugá. “Tur hende sa ku e gobernashon anterior a kumpra Plantashi Fontein for di un propietario privá. E meta tabata ku e plantashi lo bolbe den man di gobierno Boneriano i lo bira un parke públiko pa e komunidat por disfrutá di dje. Nos no por kere ku despues di 8 luna ainda no a hasi nada ku e proyekto aki,” asina Ellis i Domacasse ta bisa.

Ellis i Domacasse ta lamentá tambe ku miembronan di e koalishon aktual, manera Daisy Coffie (M21) i Clark Abraham (PDB) a bisa ku e kompra realmente nunka no a tuma lugá. Un komentario ku, segun Ellis i Domacasse ta bisa, no tin ningun base.

Pregunta

Via e frakshon di MPB den e Konseho Insular, e dos representante di partido blou a hasi vários pregunta na Kolegio Ehekutivo. E frakshon ke sa kon ta pará ku e proyekto, kiko ta e plannan di e gobièrnu, i si nan tin intenshon di sigui ku e plan ku a keda delineá bou di e gobièrnu anterior.