Kralendijk, The Bottom, Saba – Tantu na Boneiru komo na Saba mucha hòmbernan di 11 te 18 aña ta promedio mas positivo tokante nan felisidat ku mucha muhénan. Na Boneiru hóbennan ta bisa partikularmente ku nan ta hunga ‘game’ ku frekuensia den nan tempu liber, na Saba esei ta konta tambe pa palabrashon pa topa amigunan pafó di kas.

Riba ámbos isla mas di un kuart di e hóbennan ta duna di konosé ku nan ta fèrfelá nan mes ku frekuensia, partikularmente mucha muhénan na Saba ta fèrfelá nan mes frekuentemente. Esaki ta resultá for di sifranan nobo di e Investigashon di alumnonan Hulanda Karibense, ku a tene fin di 2020 den kuadro di e Monitòr di hubentut nashonal.

A puntra alumnonan[1] (te 18 aña) di enseñansa avansá (vo) i enseñansa profeshonal sekundario (mbo) pa duna un sifra di rapòrt entre 1 i 10 den ki grado nan ta sinti nan mes felis, i un sifra pa nan satisfakshon ku bida. Den 2020 hóbennan na Boneiru a duna promedio un 7,7 pa tantu nan felisidat komo nan satisfakshon ku bida. Na Saba nan a balorá nan felisidat ku un 7,1, nan satisfakshon ku un 6,7.

Mucha hòmbernan mas felis ku mucha muhénan

Tantu na Boneiru komo na Saba mucha hòmbernan ta sinti nan mes mas felis ku mucha muhénan. Na Boneiru mucha hòmbernan ta mas satisfecho tambe ku bida ku mucha muhénan, na Saba esaki ta kasi igual. Banda di esei hóbennan te 15 aña na Boneiru ta huzga tantu nan felisidat komo satisfakshon promedio mas haltu ku hóbennan di 15 te 18 aña. Na Saba pa ámbos grupo di edat esaki ta kasi mes haltu.

Hunga ‘game’ e dibertishon mas popular di mucha hòmbernan na Boneiru

Na Boneiru 43 porshento di e alumnonan di vo i mbo di 11 te 18 aña ta duna di konosé ku frekuentemente nan ta hunga ‘game’ den nan tempu liber[2]. Banda di esei nan ta hasi deporte relativamente frekuente (37 porshento), hopi bia nan ta hasi kosnan kreativo (35 porshento) i nan ta palabrá hopi bia ku nan amigunan pafó di kas (30 porshento). Mucha hòmbernan ta hunga ‘game’ mas frekuente (61 porshento) ku mucha muhénan (26 porshento); tambe nan ta hasi deporte mas frekuente i ta palabrá mas frekuente ku amigunan pafó di kas. Mucha muhénan al kontrario mas bia ta hasi kosnan kreativo: 39 porshento, kompará ku 31 porshento di e mucha hòmbernan. Trabou boluntario ta loke tantu mucha hòmber (17 porshento) komo mucha muhé (15 porshento) ta hasi ménos frekuente komo dibertishon.

Palabrá ku amigunan pafó di kas dibertishon importante na Saba

Na Saba 54 porshento di hóbennan di 11 te 18 aña ta duna di konosé ku nan ta palabrá frekuentemente ku amigunan pafó di kas. Esaki ta hasi esei un dibertishon popular riba e isla aki, meskos ku hunga ‘game’ (53 porshento), hasi deporte (52 porshento) i hasi kosnan kreativo (48 porshento). Meskos ku na Boneiru mucha hòmbernan ta hunga ‘game’ i hasi deporte konsiderablemente mas tantu ku mucha muhénan. Tambe mucha hòmbernan den nan tempu liber ta palabrá mas frekuente ku amigunan pafó di kas ku mucha muhénan. Riba tereno di kosnan kreativo kasi no tin diferensia entre mucha hòmber i mucha muhé, esaki kontrali na hóbenan di mes edat na Boneiru.

Partikularmente mucha muhénan ta fèrfelá nan mes ku frekuensia na Saba

Tantu na Boneiru komo na Saba mas di un kuart di e alumnonan di 11 te 18 aña di  vo i mbo ta duna di konosé ku nan ta fèrfelá[3] nan mes ku frekuensia. Partikularmente mucha muhénan na Saba ta duna di konosé ku nan ta fèrfelá nan mes ku frekuensia: 44 porshento. Esaki ta kasi dos bia mas tantu ku bou di mucha hòmbernan, pero tambe mas ku bou di mucha muhénan na Boneiru (29 porshento). Partikularmente esnan di 11- te 15 aña na Saba ta fèrfelá nan mes relativamente mas frekuente, kompará ku hóbenan di mes edat na Boneiru.

Fuentenan
StatLine – Caribisch NL; vo en mbo scholieren, ervaren gezondheid en welzijnhttps://jmopendata.cbs.nl/#/JM/nl/dataset/20285NED

StatLine – Caribisch NL; vo en mbo scholieren tot 18 jaar, tijdsbestedinghttps://jmopendata.cbs.nl/#/JM/nl/dataset/20293NED

Lenknan relevante

StatLine – Jeugdmonitor StatLine Caribisch Nederland:
https://jmopendata.cbs.nl/#/JM/nl/navigatieScherm/thema?themaNr=20227

Onderzoeksbeschrijving – Scholierenonderzoek Caribisch Nederland
https://jeugdmonitor.cbs.nl/onderzoeksbeschrijvingen/Scholierenonderzoek

---

Lesa tambe:

• 
  Fundashon Across The Isles ta bai kordiná  aktividat rondo di  historia di sklabitut na Boneiru
• 
  Tayer skibi buki pa mucha tokante herensia kultural, tabata un gran éksito
• 
  Fondo Nasional di Restorashon ta duna un fiansa pa restorashon di The Old Gin House na Sint-Eustatius
• 
  Kampaña nobo ‘You’ve got the power’ a ranka sali na Boneiru
• 
  Thuersten Winklaar ta bringa pa e título di Kampion Hulandes na Den Haag