WILLEMSTAD – Despues di a warda hopi e dia a yega. Fundashon Museo Tula (FMT) i Stichting Monumentenzorg Curaçao a firma djabièrnè último un akuerdo di hür pa Lanthuis Knip. Ku e firmamentu aki por kuminsá ku diseño di e interior di museo Tula nobo riba e sitio históriko aki.

Komo doño Stichting Monumentenzorg, a invertí kaba alrededor di dos tòn den e edifisio for di novèmber 2022. E intenshon di e invershon ta pa prepará e edifisio pa e plannan di FMT pa habri un Museo Tula nobo i interaktivo. Revishon di e sistema di koriente kompleto, reparashon di tur loke ta di palu i hasi un flur bieu di piedra chikí chikí lizu ta kai bou di e trabounan di renobashon

Pareu ku e renobashonnan aki a sigui traha riba e plannan di FMT. Ministerio di Enseñansa i Kultura a tuma e kolekshon di e museo bieu, ku mester a sera su portanan na 2020 pa motibu di bankarota di Kas di Kultura, i lo pone esaki na disposishon di e museo nobo.

Rebeldia

E eksposishon nobo den e museo ta konsentrá riba e tema: ‘Rebeldia, kapasidat di rekuperashon i e proseso di emansipashon’. E lo ilustrá e diferente formanan di rebeldia kontra e sistema di sklabitut den historia.

Shurbey Alberto di Fundashon Museo Tula ta papia di un ‘triunfo di perseveransia di hopi hende’. Marcel Dennert, di Stichting Monumentenzorg Curaçao tambe ta sumamente satisfecho. “Nos ta konvensí ku FMT lo manehá e patrimonio bunita aki ku fervor”, segun Dennert.

Ta spera ku e asina yamá ‘soft opening’ di e Museo Tula nobo lo tuma lugá despues di zomer. E museo ta konta e historia di e lantamentu di katibu na 1795, ku a kuminsá na Lanthuis Knip bou di guia di Tula ku nan a hasi katibu.