WILLEMSTAD – Djarason último a kuminsá ku un seri di Masterclass na Universidat di Kòrsou na kaminda pa  Konmemorashon Nashonal di 160 aña abolishon di sklabitut. E seri di masterclass ta bou di guia di Fundashon Museo Tula.

Na tur a inskribí 130 persona pa e kurso. Nobenta persona a partisipá na e promé presentashon, di kua mayoria tabata onlain.

E promé lektura tabata na enkargo di Profesor Verene Shepherd. E ta un eksperto destaká i rekonosé internashonalmente riba e tereno di sklabitut i pago di rehabilitashon. 

Pagonan di rehabilitashon

El a asentuá e daño ku sklabitut a okashoná i e nesesidat di pago di rehabilitashon. Banda di asentuá e nesesidat di pago di rehabilitashon, Sheperd a trese dilanti ku e pagonan aki no mester ta finansieramente so, pero mester kontené tambe rekonosementu i diskulpa moral. 

Segun Shepherd kolonialismo a forma un faktor klave den krea i hasi pobresa duradero den hopi pais ku podernan Europeo a kolonisá.

E petishon pa pago di rehabilitashon ta dirigí na e anterior podernan kolonial, entre kua Hulanda, ku tabata embolbí den komersio di katibu trans-Atlántiko i  kolonialismo.

Hulanda

Shepherd a referí spesífikamente riba e ròl di e Hulandesnan den  komersio di katibu trans-Atlántiko, inkluso nan embolbimentu den trafikashon di Afrikanonan ku a hasi katibu. 

El a asentuá tambe e echo ku gobièrnu Hulandes a ofresé diskulpa pa su ròl den komersio di katibu trans-Atlántiko, pero e ta bisa ku ta kuestioná e diskulpa, lokual ta e kaso tambe serka e komishon di Kòrsou. Ademas gobièrnu Hulandes a duna di konosé di lo no paga pagonan di rehabilitashon.

Miares di dòler

Battle Group, un ofisina konsultativo ekonómiko konosí, a investigá e impakto di sklabitut i kolonialismo riba e paisnan Karibense. E ofisina tin e balor ekonómiko di trabou no pagá i otro pèrdida ku e paisnan Karibense a sufri a konsekuensia di sklabitut i kolonialismo, lokual ta laba den miares di dòler.

Segun Shepherd e rapòrt di Battle Group ta importante pasobra e ta ofresé un base sólido pa e pagonan di rehabilitashon. E ta kuantifiká e impakto ekonómiko di sklabitut i kolonialismo riba e área Karibense i ta ofresé un kuadro pa kalkulá e pagonan di rehabilitashon ku ta basá riba teoria i análisis ekonómiko.

Genealogia históriko

Den lus di pasado di sklabitut, e di dos masterclass ta trata tambe e tópiko: Genealogia históriko/Palu di famia. Inskripshon ta habrí. E presentashon ta tuma lugá riba djasabra 15 di aprel di 10’or pa 12’or i ta na enkargo di Christel Monsanto.