WILLEMSTAD – Un promedio di algu mas ku shete di djes kambernan di hotel tabata okupá na Kòrsou den 2022, Chata ta informá. E organisashon ta representá djeskuater hotel den e sektor hotelero ku huntu tin mas ku 2500 kamber. Esei ta algu mas ku e mitar di tur kamber di hotel na Kòrsou.

E preis promedio pa preis di kamber pa dia na 2022 tabata algu mas ku 200 dòler. E rendimentu promedio pa kada kamber disponibel tabata kasi 150 dòler.

Kompará ku 2021 e hotèlnan na Kòrsou a mira aña pasá un subida di kasi binti porshento den e okupashon promedio di kamber. E preis promedio di kamber di e hotèlnan tambe a subi ku kasi binti porshento.

Aruba

Segun  Aruba Hotel and Tourism Association e hotèlnan na Aruba a yega un okupashon promedio di kamber di 75 porshento. E preis promedio di kamber tabata kasi 110 dòler mas karu. E rendimentu pa kamber tabata mas ku 230 dòler, lokual ta ochenta dòler mas ku na Kòrsou.