WILLEMSTAD – Parlamentu Europeo tambe ta bai pone un krans durante konmemorashon di Tula djarason benidero.  Esei Samira Rafaela, ku ta Miembro di Parlamentu Europeo pa D66 i ku aktualmente ta na Kòrsou, a informá.

E inisiativa a sali di Rafaela mes ku a entregá un petishon serka presidente di Parlamentu Europeo na Bruselas. “E paisnan i teritorionan ultramar ta parti di e famia Europeo”, Rafaela ta bisa. 

“Konmemorashon di nos pasado di sklabitut mester sosodé strukturalmente den i for di Europa i ta tambe parti di e plan anti-diskriminatorio i anti-rasismo di Europa”, segun Rafaela. “ Spesialmente importante ta pa rekonosé e influensia ku e pasado di sklabitut tin riba e komunidatnan aktual”.

E miembro di parlamento Europeo ta sinti’é  honrá ku e por pone un krans na nòmber di Parlamento Europeo. “Ta un rekonosimentu  di nos pasado di sklabitut. Tula pues ta p’ami un  héroe  personal. Mi a krese lanta kuné i sa hopi di dje”.

Segun Rafaela e ponementu di krans aki ta pas bunita den e espíritu di tempu di 2022, kaminda nos ta realisá mas i tin konosementu  di kon importante ta pa riba nivel kolektivo tambe duna kontesta riba  e proseso di sanashon ei.