KRALENDIJK – Den e di tres i di kuater siman di òktober, hendenan lokal riba 60 aña i hendenan ku ta pasa wenter na Boneiru riba 60 aña por pasa e angua kontra grip i e angua kontra Corona. Esakinan ta kompletamente gratis.

Nan por skohe pa pasa solamente e angua kontra grip, solamente e angua kontra Corona òf tur dos angua pareu. Hendenan mas yòn ku 60 aña ku diabétis, problema ku pulmon, keho di kurason ets. tambe por pasa e anguanan. Den e di tres siman i e di kuater siman di òktober, Departamento di Salubridat Públiko i dòkternan di kas ta tene 2 dia pa pasa angua na un lugá sentral. 

Pronto ta anunsiá e fechanan i lugá di e dos dianan pa pasa angua. Despues di e dos dianan di pasa angua na un lugá sentral, por pasa e angua kontra corona i esun kontra grip na ora fiho na ofisinanan di dòkter di kas. Na òktober ta sigui mas informashon tokante esaki. Den práktika ta resultá ku ta seif pa pasa e angua kontra grip i e angua kontra corona na mes momentu. Den un kaso asina, e dos anguanan ta funshoná bon.