KRALENDIJK- Na opinion di e kandidato pa lista di M21, Carlos López-Natera na Boneiru aktualmente tin sigur lugá pa dos laboratorio i tambe kuater botika. 

“Na aña 2010 Boneiru tabatin un poblashon di aproksimadamente 15.000 habitante. Den e tempu ei tabatin tres botika i un laboratorio. Aktualmente komo parti di e proseso di kambio i ku un poblashon di kasi 23.000 habitante tin 4 botika i dos laboratorio”.

López-Natera ta mustra riba e echo ku hopi siudadano ta di opinion ku servisio di e laboratorionan i e botika¬nan no ta sufisiente pa por atendé ku nesesidat di e poblashon aktual. “Si nos ta konsiderá di un banda e intenshon firme pa sera BonLab i di otro banda e  konstante kambionan di orario di e botikanan, por bisa ku den e dos áreanan akí  tin fayonan grandi ku lamentabelmente di forma negativo ta afektá kalidat di bida di henter nos poblashon”. 

Seramentu di BonLab

Segun López-Natera, seramentu di BonLab sigur ta bai okashoná ku servisio di e  laboratorio ku ta bai keda den funshon lo kai den otro. 

“Sentralisashon den un lugá so ta bai tin un ekseso di demanda i fortifikashon di e monopolio komo konsekuensia. Den kaso di e botikanan no ta un sekreto ku e manera kon nan ta trahando awor akí ta kousa hopi molèster i malkontentu serka nan klientenan: tempu pa warda ta largu i kambio di orario sin previo notifikashon ta algu komun i poko funshonal loke ta trese hopi inkonveniensia kuné”.