WILLEMSTAD – Servisio di impuesto a risibí na luna di yanüari kasi nuebe mion florin ménos ku a presupuestá di preminan sosial. Pa 2023 kompleto a kalkulá e entradanan di premi mei porshento mas haltu ku e realisatiecijfers di 2022.

Segun e ministerio di Finansas no tin motibu pa preukupá awor ku e entradanan di premi di luna di yanüari ta un tiki mas abou ku presupuestá.

E repartishon di e entradanan presupuestá di e lunanan no ta un siensia eksakto i ta pesei e realisatiecijfers mensual ta diferensiá tambe kasi pa definishon di e presupuesto, segun e ministerio.

E entradanan di impuesto total ku a realisá tabata igual ku e presupuesto i kasi binti mion florin mas haltu ku luna di yanüari di aña pasá.

E ‘presupuesto di likides’ ta importante pa ministerio di Finansas ta na altura si ta drenta sufisiente sèn pa por kumpli ku obligashonnan finansiero. Tambe e ta konta pa pagonan relatá na fondonan sosial manera SVB.

Pa loke ta trata èrfpagt tambe a drenta ménos ku a presupuestá na luna di yanüari. Na lugá di kasi dos mion florin a drenta solamente 600.000 florin. E splikashon pa esaki por ta ku kasi no a manda fakturanan di èrfpagt di aña 2022, segun e ministerio. Domeinbeheer lo rekuperá e retraso aki riba termino mas korto posibel.