Nina Ansary a entamá na Merka un kaso den korte kontra Banko Sentral di Kòrsou i Sint Maarten. Nan lo a kometé violáshon, ekspropiando su propiedat.

Den su keho di 17 di yanüari e yu muhé di Hushang Ansary ta duna balor na un Tratado di Amistad, un Tratado di Komersio i un Tratado di Transporte marítimo di 1956 entre Estados Unido di Merka i Reino Hulandes.

Ansary ta eksigí un indemnisashon di por lo ménos 110 mion dòler, pasobra Banko Sentral a violá na diferente okashon e Tratado di Amistat pa loke ta trata su partisipashon minoritario den Parman International BV, bou di kua Ennia tambe ta kai. 

Nina Ansari ta argumentá ku e tin un partisipashon di 15,9 porshento  den Parman, huntu ku otro akshonistanan Merikano, entre kua su tata Hushang Ansary, ku nan ta deskribí den e keho komo e akshonista prinsipal di Parman.`

Reglamentu di urgensia 

Segun e keho Banko Sentral a haña na yüli 2018 un outorisashon di urgensia di kortenan di Kòrsou pa tuma e aktividatnan di seguro di Parman, pasobra nan no ta kumpli ku e eksigensianan legal pa loke ta trata e kapital di Ennia. E kòntròl tabatin komo meta pa restrukturá e aktividatnan aki, pa haña en partikular un parti di e kapital di e grupo den Estados Unido bèk

Sinembargo Banko Sentral a nenga te ku awor pa ehekutá e plan aki i pa no duna e empresanan restrukturá bèk na nan akshonistanan, i a preferá pa keda ku e kapital algun aña, Ansary ta argumentá.

Nina Ansary ta motivá ku a laga e akshonistanan hopi tempu den insertidumbre di e destino di e kapital i ta resien a haña sa ku mayoria kapital pa basta tempu kaba ta solvente i ku pues por a duna nan bèk.

Den e konteksto aki Ansary ta trese dilanti ku ta e intenshon di Banko Sentral pa malversá e kapital pa su propio propósitonan ekonómiko i polítiko.

Kapital

E kapital ta enserá akshonnan den Banco di Caribe, ku aparentemente a bende pa un preis abou ku un negoshante lokal, ku segun Ansary tin vínkulo ku e direktor di Banko Sentral.

Mullet Bay na Sint Maarten tambe ta pertenesé na e kapital i ku polítikonan lokal a purba ‘duna bèk na hendenan”, manera ta resultá for di un komishon speshal di investigashon ku parlamento na Philipsburg a insituí. Un propósito ku segun Ansary e gerensia aktual di Banko Sentral ta fasilitá.

Nina Ansary ta kalkulá ku su pèrdida a konsekuensia di e akontesimentunan aki lo no ta ménos ku 110 mion dòler.