KRALENDIJK- Entrante promé di desèmber 2022, ta nombra Nina den Heyer komo hefe di servisio di Enseñansa, Kultura i Siensia (OCW) na Hulanda Karibense. 

For di un proseso di solisitut i selekshon, ku kandidato di tantu e parti Karibense komo Oropeo di Reino, e a bini dilanti komo e mihó kandidato.

Nina den Heyer ainda ta diputado di Direktorado Komunidat i Kuido di Entidat Públiko Boneiru. Promé ku esaki, e a traha komo direktora suplente di unidat di Asuntu Sosial i Empleo (SZW) na Hulanda Karibense for di promé di sèptèmber 2011 te ku mei 2016. Di sèptèmber 2017 te ku yüli 2018, e a realisá tambe diferente proyekto pa RCN, e.o. na Belastingdienst.

Nina den Heyer ta sigui Nolly Oleana, kende a okupá e puesto aki for di 2015 i na final di e aña aki ta bai ku penshun.  

Honor

“Mi ta gradesido pa e konfiansa ku komunidat di Boneiru a pone den mi tantu komo polítiko komo mandatario den e periodo tras di lomba. Ta i tabata un honor pa sirbi mi pueblo”, asina Den Heyer a skibi den un deklarashon djabièrnè atardi. Den Heyer a yama danki pa e palabranan di sosten ku ela risibí for di diferente skina den Reino.