KRALENDIJK- For di 2011 ta posibel na Boneiru, pa pasa Staatsexamen hulandes pa Enseñansa Sekundario den diferente materia riba nivel di VMBO, HAVO i VWO. Den kuadro di esaki, DUO, den kolaborashon ku OCW-CG, ta organisá un anochi di informashon riba djamars 29 di òktober 2024.

E anochi di informashon akí ta pa mayornan i/òf kuidadó di hóbennan ku ta bai skol i kualke persona den region ku ta deseá di pasa staatsexamen na Boneiru. Lo splika, entre otro, kiko eksaktamente e staatsexamen ta i pa ken e ta destiná. Tambe lo splika e diferensia- i similaridatnan entre staatsexamen i enseñansa regular. 

Tambe lo duna informashon práktiko tokante e staatsexamen, manera kon pa inskribí, kiko e gastunan ta, ki fecha presis e èksamennan ta tuma lugá, kon i na unda nan ta tuma lugá i kon un hende por prepará su mes mihó.  

Staatsexamen no ta solamente pa hóbennan ku ta bai skol, tur hende por partisipá na esaki. Bo por skohe pa un pakete kompletu di materia òf pa un kantidat di materia lòs, ku bo por parti ofer di diferente aña. Di e forma akí bo ta kolektá sertifikadonan ku huntu tin balor di un diploma. E diploma aki tin mesun balor ku unu di enseñansa regular. 

Enkuentro

Tur hende ku ke sa mas di e materia ta bonbiní pa partisipá na e enkuentro informativo na Liseo Boneriano, Kaya Amsterdam s/n, djamars 29 di òktober 2024 for di 7.30 or te ku 9or di anochi.