KRALENDIJK – Den un reunión resien di Konseho Insular di Boneiru, frakshon M21 a presentá vários pregunta  tokante e problemanan relashoná ku nan kachónan na e isla. 

M21 TA MUSTRA KU Entidat Públiko Boneiru a establesé un grupo di trabou na mart 2022 ku tarea pa identifiká i atendé e problemátika aki. Sinembargo, basá riba e respondenan risibí for di e grupo di trabou aki, ta paresé ku nan no ta tuma e problema di kachó na serio ni nan mes ta hasi investigashon profundo. 

Segun M21 ta bisa, na lugá di esaki, nan ta referí na un estudio kual a ser hasí  pa Wolfs Compagnie na yüli 2021, kual no ta adaptá spesífikamente na situashon aktual di Boneiru. Ademas, e grupo di trabou ta repiti kada bes ku e problema ta kompleho i ta nesesitá tempu pa elaborá un plan adekuá, mientras nan mes no ta rekognosé nan propio negligensia den kumplimentu di lei i kontrol di animal. 

Akshon rápido

M21 pa medio di Norbert Tadema ta urgi akshon rápido pa enforsá e legislashon ekzistente, espesialmente teniendo kuenta ku Boneiru tin legislashon na vigor desde 1998 ku mester ta vigente. Ademas, nan ta propone sigui e ehèmpel di Aruba, kual a implementá medidanan efektivo pa abordá e problema di kachó. M21 ta sugeri lansa un kampaña di konshientisashon konprehensivo pa asigurá ku donjonan di kachó kumpli ku lei. E kampaña lo duna nan un periodo di grasia pa kumpli promé ku komienso di enforshament strikto.