Kralendijk- Ofisina di Impusto (Belastingdienst CN) ta informá ku nan a traha un asina yamá number di CRIB (Centraal Registratie Informatie Belastingplichtige), pa tur habitante entre 0 i 67 aña di edat. CRIB ta referí na Registrashon Sentral di Informashon di tur persona ku mester paga impuesto.

Ta manda e numbernan personal via un karta na tur persona, ku ta ku ta kai den e grupo di edat aki ku ta inskribí na registro sivil di Boneiru, Sint Eustatius i Saba. E bentaha ta ku no tin mester di bin ofisina di impuesto mas pa pidi òf pa bin buska un number di CRIB. Esaki no ta konta pa kompania.

Kiko ta un number di CRIB?

Un number di CRIB ta un number úniko ku ta mará na un persona, e ta pa tur hende ku ta registrá na Belastingdienst CN. E number ta na di promé lugá destiná pa kontakto entre persona i servisio di gobièrnu. Bo por pensa na por ehèmpel Belastingdienst, Entidat Públiko, Asuntunan Sosial òf Finansiamentu di Estudio. Hasiendo uso di number di CRIB, por prosesá pago por ehèmpel na un forma mas simpel i korekto.

Pa kiko bo mester di dje?

Bo mester di un number di CRIB ora bo tin kontakto ku Belastingdienst, por ehèmpel ora di yena bo formulario di deklarashon.

Ora di pago na Belastingdienst bo mester menshoná e number akí. Ora bo kumpra un outo òf motosaikel na Boneiru i bo ke pone number di e vehíkulo na bo nòmber serka Entidat Públiko, bo mester di number di CRIB tambe. Banda di esei bo (futuro) dunadó di trabou mester di number di CRIB pa atministrashon di salario.

Privasidat

Ku number di CRIB ta posibel pa saka afó ta di ken e number ta. Ta p’esei uso deskuidá di number di CRIB por trese riesgo di privasidat kuné. Por ehèmpel mal uso di dato personal i froude di identidat. Pa e motibu ei ta bon pa ta kouteloso ku dunamentu di bo number di CRIB.

Warda bo number bon

Habitante di Hulanda Karibense ku tabatin di aber anteriormente  ku Belastingdienst CN, tin un number di CRIB kaba i nan no ta haña un karta awor. Warda bo number di CRIB bon. Si abo òf un di e miembronan di bo famia a pèrdè nan number di CRIB tòg, e ora ei bo por buska un deklarashon di CRIB na Belastingdienst.  Bo mester bai ku un identifikashon.