WILLEMSTAD – Na luna di mei hotèlnan na Kòrsou tabatin un okupashon promedio di 64 porshento. Esei ta un bahada di kasi tres porshento kompará ku e mésun periodo aña pasá, segun datonan di Curaçao Hotel and Tourism Association, CHATA.

En kambio e hotèlnan a mira un subida di mas ku seis porshento den e preis promedio pa kamber pa dia. Esun ku ke drumi un anochi den un hotèl ta paga un averahe di 208 dòler pa esei.

E datonan, ku a kompilá di un prueba entre 17 hotèl ku 2.866 kamber, tambe ta mustra segun CHATA un kresementu di djes porshento den e total di bishitante ku a keda un anochi. Banda di esei e estadia promedio di turistanan ku ta keda un anochi a baha na algu mas ku ocho dia

Eskala 

Curaçao Tourist Board ta informá tambe ku na luna di mei Kòrsou a mira un oumento di kasi 22 porshento den e kantidat di bishitante ku ta yega via eskalanan. Na luna di mei tabata trata di un total di kasi 44 mil eskala. E kantidat di eskala for di Estados Unido a krese eksplosivamente ku 138 porshento, mientras e kantidat di eskala for di Hulanda a baha ku mas ku djessinku porshento.

Turismo krusero tambe a floria, ku un oumento di kasi 44 porshento di pasahero krusero na luna di mei, i un kresementu di 105 porshento den e promé lunanan di aña 2023 kompará ku e mésun periodo aña pasá. Na tur Kòrsou a risibí den e periodo aki 162 barku krusero ku kasi 412 mil pasahero na bordo.