UPB a presentá durante rueda di prensa, relashoná ku su 53 aña di eksistensia, algun persona ku a afiliá na e partido. E panorama polítiko a kambia dia 22 di òktober 2022, kisas tin opositor di UPB ku lo desmentí esaki. 

Dia mi a skirbi ku James Kroon ta e polítiko mas popular, tin hende a puntra mi ku mi a salta di kabes. James, a base di loke e ta hasi i ku tur hende por mira, a bira mas fuerte i awor por mira un parti di e resultado. 

Sigur ta ku sierto gremio den komunidat i esnan pa motibu di turbulensia den UPB na 2019 a bai otro partido lo skohe pa stabilidat i siguransa i sostené UPB. E stabilidat ta e parti di trabou, ekonomia i no bringa ku Hulanda. 

Awor e otro partidonan lo tin ku puntra kon ta bai aktua kontra UPB. Sigui mustra riba Rotònde, korupshon, karetera, ladronisia, integridat i mas puntonan negativo no tin balides mas . E lema traha pa e hende a lanta basta stòf, pero frankamente bisá no tin argumento kontra e lema aki. Bill Clinton a bira presidente usando e lema “It’s the economy, dummy” James ta bisa “Ta bai pa e hende shon ignorante”. Imaginá so si Nina den Heyer duna konseho di voto na UPB kua partido, den bon papiamentu, lo haña e sla di baka. UPB ta bai hiba un kampaña pa saka mayoria. 

Konsekuensia ta ku MPB ta pèrdè asiento i DP ta keda ocho aña den oposishon. Parse ku UPB lo usa lema ku DP tabata usa durante bròkès pa reunion públiko. No tin awa pa laba ni sèrbètè pa seka.