WILLEMSTAD – Kòrsou Transparente ta puntra su mes ki dia Kòrsou ta partisipá na e tratado di Nashonnan Uní kontra korupshon.

Nashonnan Uní a deklará 9 di dezèmber komo Dia Internashonal kontra Korupshon. For di 2003 mundialmente ta para ketu  riba e dia aki na e tema korupshon,  pa asina promové konsientisashon bou di tur aktor den komunidat i alabes reforsá e konosementu den prevení i kombatí esaki.

Den dicho aña Nashonnan Uní a aseptá tambe e Tratado enkuanto kombatimentu di korupshon i e tratado aki a drenta na vigor na 2005.

Kontrali na e 189 partidonan ku si a ratifiká (rekonosimentu mundialmente) e tratado aki, Kòrsou a skohe pa ainda no laga e tratado aki konta p’e. Ku esaki Kòrsou ta posishoná su mes den un posishon eksepshonal.

Fundashon Kòrsou Transparente (FKT) ta un inisiativa di siudadanonan ku a surgi despues di e investigashon di Transparency International (2013) tokante debilidat di korupshon na Kòrsou.

Un rekomendashon importante di Transparency International tabata e tempu ei dirigí riba ratifiká dicho tratado. Den kuadro di dia kontra korupshon 2022 FKT ta para ketu na e importansia pa uni pronto ku dicho tratado.

E tratado ta e úniko instrumento rekonosé universalmente pa prevení i kombatí korupshon. E ta sirbi komo e kuadro internashonal pa koperashon ku e meta pa reforsá prevenshon di korupshon, mitigá riesgonan di korupshon, i alabes pa kombatí labamentu di plaka.

E tratado ta kontené reglanan pa prevenshon, investigashon i persekushon di korupshon. Tambe al respekto konhelá, konfiská i duna bèk entradanan di krímennan.

Definishon 

Den e tratado no a inkluí un definishon pa korupshon. En kambio a skohe pa deskribí sierto komportashon ku hopi biaha ta relatá ku otro kasonan kastigabel.

Segun e tratado mester tipifiká e komportashonnan aki komo delito den e pais miembro. Ta trata di soborno aktivo, soborno pasivo, falsifikashon, malversashon di fondo, influensia sin outorisashon kaminda un persona influyente ta usa su influensia a kambio di plaka, labamentu di plaka i opstakulisá hustisia.

Mayoria di e komportashonnan aki ta sosodé tantu den sektor públiko, kaminda funshonarionan di gobièrnu i polítikonan/mandatarionan ta enbolbí, komo den sektor privá.

Mirando e tantísimo formanan ku korupshon por tin i kaminda e posishon di poder di un persona òf un grupo di persona ta pará sentral, Transparency International (e organisashon non-gubernamental internashonal pa kombatimentu di korupshon) ta deskribí korupshon komo maluso di poder ku a konfia na un persona/grupo di persona pa benefisio personal.

E komportashonnan aki tin komo konsekuensia ku ta daña e konfiansa di  siudadanonan den estado di derecho i nan ta stroba e desaroyo ekonómiko, pasobra invershonistanan estranhero no ta bini.  Ku esaki e desigualdat sosial ta empeorá i pobresa ta oumentá.

Den e tratado a determiná un kantidat di regla manera aplikashon di kódigo di kondukta pa ámtenar, introdusí leinan transparante pa tene destaho públiko, kriteria ophetivo pa atkerí i promové ámtenar i lantamentu di (un) instansia(nan) ku ta enkargá ku preparashon di maneho di prevenshon i ehekushon di esaki.

Banda di esei ta mitigá e riesgo di korupshon logrando mas transparensia. Den e tratado a inkalkulá rekomendashonnan pa atministrashon di finansas públiko, reforsá normanan pa kontabilidat i ouditoria (tambe den sektor partikular) i tambe garantisá independensia di poder hudisial i di ministerio públiko.

Finalmente e pais miembro ta pèrkurá pa: un bon servisio di informashon pa públiko, transparensia den finansiamentu di partidonan polítiko, introdusí un reglamentu di denunsiante (kaminda siudadanonan, anónimo òf nò, por raportá  komportashonnan kastigabel ku ta relatá na korupshon).

Tambe e tratado ta kontené klóusulanan relashoná ku koperashon internashonal i restitushon di ophetonan ku a konfiská pa medio di korupshon (òf otro krímen ku a menshoná den e tratado).

Bentahanan pa Kòrsou

Despues di 17 aña ku e tratado a drenta na vigor, Kòrsou ainda no a uni su mes na esaki. Apesar ku Kòrsou ta partido den un kantidat grandi di tratado riba tur sorto di tereno, su antesesor hurídiko (Antia Hulandes) a duna di konosé e tempu ei (durante e proseso di konsulta) di ta deseá ku e ta aplikabel, pero a indiká ku mester pèrkurá promé pa legislashon di aplikashon.

Den e kuadro aki a remarká ku e mester revisá e Kódigo di Derecho penal i  Prosedimientu penal. Mientrastantu e Kódigo di Derecho penal nobo pa Kòrsou a drenta na vigor na 2011.

FKT ta haña importante pa no sigui posponé e aplikabilidat na e tratado aki. Si no a finalisá tur lei di aplikashon, por averiguá si ta posibel pa laga e tratado drenta na vigor i pidi ayudo tékniko pa prepare e leinan di aplikashon ku falta.

Pasobra e tratado ta un instrument sumamente adekuá pa kombatí na un manera mas efisiente e efekto debilitante di korupshon riba desaroyo ekonómiko di un pais i ta pèrkurá pa bon gobernashon, lokual ta kontribuí na stabilidat polítiko i ekonómiko. Asina e konfiansa ku siudadanonan tin den e estado di derecho ta bira mas grandi.

Uniendo su mes na e tratado, Kòrsou ta demostrá di ta desidido den kombatimentu di korupshon i protekshon di su siudadanonan kontra su konsekuensianan desastroso.

Banda di esei un afiliashon ta favoresé e klima di invershon i e imáhen pa nos pais. Estado  Unido a ekspresá su sosten inkondishonal kaba pa sostené e paisnan miembro ku ehekushon di e tratado. E mensahe di Fundashon Kòrsou Transparente pa e dia kontra korupshon 2022 ta pues: No laga suspenshon bira posponementu!!