KRALENDIJK- E Frakshon di Partido Demokrátiko Boneriano (PDB) djaweps anochi a baha pisá riba Kolegio Ehekutivo, pa e forma ku kolegio a atendá ku tur kos rondó di Chogogo Resort, pero en espesial di sierto permit verbal ku lo a duna e hotèl, pa loke ta plamamentu di santu importá riba e bich. 

Kaminda ku gezaghèber Rijna i diputado James Kroon a mantená ku nan no a hasi nada robes, i ku nan a aktua solamente den interés di Boneiru, diputado Nina den Heyer ku Hennyson Thielman si a atmití ku kosnan por a kana mihó den hinter e trayekto. 

Moshon

Frakshon di demokrat a bin armá ku varios moshon kontra di e kolegio ehekutivo den su totalidat, komo ku miembronan individual di e Kolegio. Na final sin embargo, líder di DP Clark Abraham, no a presentá su moshonnan. 

“Bisa ku kos no a kana manera debe ser ta un parti. E ta bunita i e ta bon ku nan ta atmití esaki, Abraham a bisa”. E líder di oposishon a agregá ku si e un hende ku ta atmití fout, mester e ora ei tuma riba dje pa drecha e fout, pa mustra ku e ta serio. 

Frakshon di DP ke mira awor si den reunion di konseho insular di próksimo siman Kolegio Ehekutivo spesialmente diputadonan Thielman i Den Heyer a trèk règt, loke segun nan no a kana bon. Si esaki no tuma lugá DP lo sigui ku e plan pa presentá su moshonnan pa manda Kolegio Ehekutivo i e diputadonan individualmente kas.