WILLEMSTAD – Oranje Fonds ta buska proyektonan spesial ku ta bini na remarke pa un Appeltje van Oranje 2023. E aña aki e tema ta ‘Buurtbruggenbouwers’.

Inisiativanan di bario eksitoso ku ta superá diferensianan i ta konektá habitantenan realmente ku otro, tin oportunidat di gana un di e tres Appeltjes van Oranje ku ta bai entregá pa di 21 biaha.

Kada un di e ganadónan ta risibí un eskultura di bròns ku prinsesa Beatrix a traha i un premio en efektivo di 25.000 euro, ku por usa pa e meta di e inisiativa ku a gana. Reina Máxima ta entregá e premionan anual i kada sinku aña ta toka turno na Rei Willem-Alexander.

Appeltjes van Oranje ta un inisiativa di Oranje Fonds. E premio ta pa inisiativanan ku ta meresé esei. E ta rekonosé i premia inisiativanan ku ta lucha pa un komunidat inklusivo i komprometí – inisiativanan ku ta úniko, kreativo i signifikante i ku tin por lo ménos dos aña kaba aktivo.

Pa e organisashonnan ganadó e Appeltje van Oranje ta na promé lugá un muestra di apresio pa nan trabou i dedikashon. Na mes momentu e preis tin e intenshon pa ta  un inspirashon pa otronan.

Via oranjefonds.nl/appeltjes organisashonnan por registrá nan mes pa bini na remarke pa e premio en efektivo. Na luna di òktober 2023 Reina Máxima lo entregá e Appeltjes van Oranje.