KRALENDIJK – Manera ya a kuminsa bira un tradishon, e aña aki atrobe riba 27 di aprel, Dia di Rei, lo tene e gran Feria Rotaria di Rotary Club Boneiru den Parke Wilhelmina.

Tur aña e miembronan di Rotary Club Boneiru ta organisá e feria públiko aki riba Dia di Rei, pa rekoudá fondo pa diferente bon kousa den nos komunidat. E feria a bira un atrakshon masha popular na Boneiru kaminda grandi i chikí por dibertí den Parke Wilhelmina. E aña aki atrobe lo tin diferente aktividad pa entretene grandi i chiki. 

Meskos ku añanan anterior, lo tin diferente stènt kaminda lo bende un variedat grandi di artikulonan na un bon preis. Tin artikulonan pa kas, pa ofisina, i hopi mueble, buki, paña, mata, diferente material pa konstrukshon, i hasta kòmpiuter ku elektronika. Bo mes tin ku pasa pa wak kuantu kos tin na bon preis, i sinti e dushi ambiente. E feria ta kuminsá 9’or di mainta i ta sigui te ku 3’or di atardi. Miembronan di Rotary i boluntarionan lo ta presente i kla pa yudabo. 

Tur fondo ku keda rekoudá durante e Feria Rotaria ta bai bèk den nos komunidat. Rotary ta organisa e slagbaai kids wikent tur ana, sostene e fundashon Alzheimer, Tera Bara i diferente otro bon kousa riba nos isla. Kisas por korda tambe e projektonan di ‘breakfast na skol’, fundashon lesa i skirbi i e mediabus. 

Rotary Club Boneiru ke ekstendé palabranan di gradisimentu na e diferente persona i sponser nan ku di un òf otro manera ta aportando pa hasi evento aki algu grandi. Si tin kualkier persona òf kompania interesá di kontribuí ku produktonan ku por wòrdu bendí òf kualkier otro kontribushon por hasi esaki ainda. 

Klup di Rotary Boneiru ta invitá un i tur pa bishita nos Feria Rotaria djasabra 27 di aprel aki for di 9’or di mainta den Parke Wilhelmina.