DEN HAAG – Awe atrobe euro tabata un ratu pareu ku dòler Merikano. E moneda Europeo ta bahando algun tempu kaba kompará ku e moneda Merikano i algu promé ku 10’or ora Hulandes e monedanan tabatin e mésun balor.

E oumento den balor resien di e dòler ta vinkulá ku e miedu pa un reseshon den Europa. E posishon di interes mas haltu den Estados Unido tambe ta yuda e dòler krese kompará ku e euro.

Kasi un luna pasá euro i dòler tambe tabatin e mésun balor, loke ta konosí tambe komo paridat. E tempu ei tabata promé biaha desde 2002. Algun dia despues e euro hasta tabata ménos ku un dòler na balor, pero despues e moneda komun Europeo a bolbe bira mas karu.

Pa motibu di e euro ku ta mas suak e ta bira mas karu pa personanan ku ta paga ku moneda komun i ku ke kumpra dòler i florin Antiano pa bai fakansi por ehèmpel Aruba, Kòrsou i Boneiru. Di otro banda pa habitantenan di e islanan e ta bira mas barata pa kumpra euro i bai fakansi Hulanda òf Europa pa bishitá famia.