KRALENDIJK- Na Boneiru vários hende a reakshoná ku sorpresa -i den sierto kaso indignashon- riba un ‘like’ ku a sali di parti di e Página di Facebook ofisil di Entidat Públiko, riba un publikashon polítiko di MPB. 

Lider di partido Demokrat, Clark Abraham a denunsiá e lokual ku a pasa. “Ta parse ku un hende ku tin akseso na e página aki a ‘like’ e publikashon di MPB. Pero kon esaki ta posibel. Gobièrno di Boneiru no ta supose di ta neutral ora ta trata di polítika?’, asina Abraham a puntra. 

E post en kestion, mientrastantu, por wak na vários kaminda riba internet, i hopi hende ta reakshoná rabiá riba esaki. 

No ta bon

Diputado Hennyson Thielman, ku ta responsabel pa entre otro komunikashon di Gobièrnu ta lamentá loke a pasa. “Naturalmente esaki no ta bon i no mester a pasa”, Thielman a bisa den komberashon ku Awor.nu. “Mi por sigurá ku niun hende ku ta traha den ofisina di Diputado, tin akseso na e página en kestion. Mi sospecho ta ku por ta un hende den departamentu di Komunikashon ku por a ‘like’ e post usando profil di Gobièrnu, na lugá di su perfil profil personal. Lo mester sigui investigá kiko a pasa anto wak pa e no pasa mas”.