WILLEMSTAD – E tèmpo ku Kòrsou ta paga su debe bèk na Hulanda ta asina abou, ku un pago bèk total lo bai dura kasi 300 aña. Esei por dedusí for di kontestanan di sekretario di estado Alexandra van Huffelen riba preguntanan por eskrito di Tweede Kamer.

Entre 2010 i 2020 Kòrsou a fia en total 800 mion florin. E debe total di Kòrsou na Hulanda ta na tur 2.384 miar florin na 2020.

Kòrsou a kuminsá paga bèk na 2016. Entre 2016 i 2020 Kòrsou tabata paga 8.2 mion florin bèk pa aña. Si mantené e tempo aki ta dura kasi 300 aña promé ku a kaba paga tur kos.

E debe di Kòrsou promé ku Covid-19 na 2020 tabata kasi 2,4 miar florin. Hulanda i Kòrsou a sera diferente kombenio den e último añanan en konekshon ku diferente fiansa.

E sifranan ku Van Huffelen ta presentá na Kamer no ta kontené e fiansanan di likidashon sin interes ku a suministrá komo sosten di presupuesto durante e pandemia di corona. Ku e fiansanan aki aserka e debe di estado total na Hulanda ta mas ku tres miar florin.

Mester paga e fiansanan di likidashon bèk na luna di òktober di e aña aki. Pero e paisnan a pidi pa kuminsá e siman aki ku negosashonnan pa posponé e fecha. 

Hulanda a bisa di ta para habrí pa negosashonnan tokante e kondishonnan pa esaki, pero esei por nifiká si ku ta kambia e kondishonnan di pago.