KRALENDIJK – Hòspis Kas Flamboyan a risibí un donashon den forma di un instalashon kompleto di panelnan solar danki na e esfuerso di eksperto- i organisashonnan lokal. E solushon di energia duradero aki lo mehorá e komodidat di pashèntnan terminal, nan famia- i boluntarionan konsiderablemente.

“Nos ta sumamente agradesido pa e regalo generoso aki,” Danny Rojer, direktor di Hospice Kas Flamboyan ta bisa. “E panelnan solar ta pèrmití nos pa mehorá e estadia di nos pashèntnan i nan sernan kerí konsiderablemente, spesialmente durante e periodonan kalor riba nos isla.”

E panelnan solar ta hasi posibel pa uza fen- i unidatnan di èrko mas tantu sin preukupashon pa gastunan di energia ku ta subi, loke ta importante pa bienestar di e pashèntnan. Remco Gooijer, ku ta guia e proyekto, ta deklará: “Tabata un honor pa uza nos konosementu i habilidatnan pa un meta asina digno.”

Duradero 

E instalashon ta pas den e vishon pa futuro di Hòspis Kas Flamboyan pa kontribuí na un manera duradero na medio ambiente. Richard Duijn di RMD Bouw & Beheer ta spera ku e inistiava ta inspirá otronan pa tambe kontribuí na solushonnan duradero pa institushonnan di kuido na Boneiru.

E impakto di e donashon aki ta bai mas leu ku spar energia so. E klima paden ku ta mihó no ta na bienestar di e pashèntnan so, pero tambe na bienestar di miembronan di famia ku ta pasa tempu balioso ku nan sernan kerí i na bienestar di e boluntarionan dediká ku ta duna kuido inkansabel.

E instalashon a bira posibel danki na Remco Gooijer di DTM Bonaire BV, Ben van Vugt di Aquarius, Jan Mulder di Phase 2 Phase, Jan Gommers di JG Equipment, Richard Duijn di RMD Bouw & Beheer i Ton Nuijten, ku a trese e partidonan enbolbí huntu.