Lo bai traha seis parke di hunga nobo na Boneiru. Un koperashon entre Jantje Beton, Akseso i Indebon lo pèrkurá ku muchanan na Boneiru lo por hunga mas pafó.

Fin di 2023 Jantje Beton a entregá e promé parke di hunga na Boneiru. E meta di e organisashon ta pa realisá mas sitio pa hunga ku ta aksesibel, intrépido, inspirativo i seif. Ku finansiamentu di VWS e lider di programa por a realisá e promé parke di hunga na Rincon. E tabatin hopi reakshon positivo komo resultado. Na e apertura muchanan di den bario a laga direktor di Jantje Beton sa: ‘Mi ta haña esaki e lugá di hunga mas bunita na Boneiru. Mi tin mag di hunga akinan?’ Ta resultá ku esaki lo no ta e último parke di hunga ku ta konstruí riba e isla. For di dos siman pasá a pone e promé skòp den tera den e bario Nieuw Amsterdam. Na sèptèmber lo tin un parke di hunga nobo nobo aki tambe.

“Na dezèmber 2020 nos a kuminsá ku un plan pa eksplorá sitionan pa hunga. Akinan nos a papia ku hopi stakeholder”, segun Miranda Verburg, ku nan a pone responsabel na Jantje Beton komo lider di programa di espasio pa hunga. “Nos tabatin kòmbersashon ku diputado Nina den Heyer. El a splika: “Nos ke hasi un muf ku mas espasio pa hunga dirèkt den e barionan’. Komo lider di programa nos tabatin hopi gana di sa den kua bario muchanan tabatin mas tantu falta di espasio pa hunga. Nos tabata buska oportunidatnan. Na promé instante e enfoke tabata riba Rincon. E realisashon tabata éksitoso. Awor nos ta trahando riba number dos. Finalmente e chèns ta grandi ku na tur nos ta bai realisá shete parke di hunga”. 

A  hasi un investigashon di e promé parke di hunga ku a traha na Rincon. Detektornan di movishon mester a midi kuantu biaha muchanan a drenta i sali. Tambe a hasi un investigashon kualitativo. Pa medio di listanan di pregunta a bini dilanti ku  muchanan ta haña e sitio di hunga 100% mas dushi ku e otro sitionan di hunga riba e isla.

Lucha ku kalor 

Konstruí un parke di hunga na Boneiru no ta fásil. Diseñadónan mester pensa bon kon nan ta anda ku un otro klima ku por ehèmpel esun na Hulanda. Verburg tambe ta konsiente di e situashon aki: “Un ‘glijbaan’ ta popular na Boneiru tambe. Traha ku heru i plèstik sinembargo no ta bai fásil akinan. Bo mester imaginabo ku e heru ta bira hopi kayente. Plèstik tambe tin problema ku kayente. Matnan di rùber ku nos ta uza na Hulanda no ta funshoná aki. Solo ta pone nan trèk i dobla. Pues nos ta buska alternativa”.

Situashonnan kompliká ku no por kompará ku Hulanda. Sinembargo e diseñadónan di Jantje Beton ta mira posibilidatnan: “Nos ke traha huntu ku mas tantu partidonan lokal riba e isla. Por ehèmpel nos ta trahando ku Tera Barra pa planta. Si tin palunan natural nos por krea sombra pa e muchanan. Nos no ke pa nan bira malu di solo si nan a hunga algun ora den e parke di hunga. Otro partidonan lokal por mèldu serka nos. Huntu ku nan nos ta spera di haña solushonnan duradero pa laga e parkenan di hunga bira un éksito na Boneiru”.

Hunga den Nieuw Amsterdam 

Den e bario Nieuw Amsterdam ta bini e di dos parke di hunga. Riba e plenchi tin un fèlt di basketbòl, ‘glijbaan’, espasio pa baiskel kore, kasita, mesa di piknik i un fèlt di futbòl chikí. “Ta nos di dos proyekto. Nos ke tin e kla rònt òf djis despues di fakansi di zomer. Nos ta den e fase di desaroyo pa un di tres parke di hunga. Esaki lo bini banda di misa di Rincon. Akinan nos ta haña importante ku personanan ku un desabilidat, hendenan di edat avansá, pero tambe mucha por hasi uzo di dje. E mester bira un lugá di topa otro”.

Mas parke di hunga ta sigui 

Pasobra postcodeloterij na Hulanda den koperashon ku Jantje Beton tambe a duna su aprobashon pa traha dos parke mas na Boneiru, ta parse ku lo bini un parke di hunga na Hato i den  bario di Amboina tambe. Ku finansiamentu di postcodeloterij  i VWS pa e dos parkenan aki a krea ademas espasio pa un parke di hunga na St. Eustatius (Wilhelminapark) i Saba (Golden Rock Park).

Ku Hato i Amboina riba planifikashon e markadó ta pará diripiente na sinku. Resientemente a pidi tambe si VWS ke reinvertí den Parke Tului. “Akinan nos ta bai pone e puntonan riba i”, segun Verburg. “Unda number shete ta bai bini. Esei no ta konosí ainda. Nos ta desaroyando e plan aki ainda. Tòg lo ta bunita pa laga esaki tambe bira e parke di hunga mas bunita di Boneiru, di moda ku den futuro hopi mucha por hasi uzo di dje”.