WILLEMSTAD – Parlamento di Kòrsou a bai kasi unánimamente di akuerdo ku e vershon adaptá di Ordenansa di Lei pa normalisá entradanan haltu. E periodo di transishon no ta dos aña manera gobièrnu a sugerí , pero sinku aña.

Direktornan di empresanan di gobièrnu por gana maksimal 295.000 florin bruto, e sosiedatnan anónimonan (NV) di gobièrnu mas chikitu tin un máksimo di 227.000 florin bruto komo e salario mas haltu. Asesornan tampoko no mag surpasá e montantenan aki riba un base anual.

E direktivanan di empresanan prominente na Kòrsou a drenta den e diskushon tokante normanan di entradanan haltu. Aqualectra, Curoil, Airport Holding, laboratorio ADC, Curinde, SVB, Kòntròl di tráfiko aéreo i Ofisina di Pòst i Telekomunikashon no tabata di akuerdo ku e kalkulashon nobo di nan salarionan tòp. E norma di 130 porshento lo a sali pa loke ta trata nan riba un salario máksimo di 535.000 florin.

Ku e periodo di transishon mas largu Parlamento ta komplasé te na sierto punto ku nan demanda. E grupo no tin nada di teme e próksimo dos añanan, nan ta keda ku nan salario. Den e tres añanan ku ta sigui despues si ta redusi’é progresivamente  na e norma nobo.

Introdukshon di un ordenansa di lei nobo ta un kondishon ku Hulanda a stipulá pa por redusí progresivamente  e redukshon di 12.5 porshento riba e kondishonnan di trabou di ámtenarnan.

Señora Van Huffelen tabata di akuerdo  tanten ku e montantenan koinsidí ku un márgen di 130 porshento kompará ku salario di promé minister. E no tabata di akuerdo ku e periodo di transishon mas largu.