KRALENDIJK—Djaweps 10 di ougùstùs, partido polítiko Demokrat a selebrá nan 69 aña di eksistensia. 

Atardi 6or, e miembronan di direktiva i simpatisantenan, a bai na e busto di Jul Abraham(†). Aya su bisa nietunan di e yu mas chikitu, a pone krans i despues nan a sigui direkshon pa misa na Antriol. 

Pader Alphonsus Baak, a ofisiá  e selebrashon Eukarístiko. Misa tabata kòrá kòrá, pader ku stola kòrá, sirbidónan ku faha kòrá i lèktòr akólito tambe ku su faha kòrá. Tur esaki, pasobra tabata fiesta di Martin Lorenzo. Pues Demokrat a sali di bon, un misa kolorido na e koló di partido. 

Pader Baak, durante predikashi: “No ta fásil pa hustisia drenta e hende. Ora un partido haña hopi voto, e mester bai di dilanti pueblo. Bos di pueblo ta bos di Dios. Laga bo reino bini na nos. Ta nifiká, ku boluntat di Dios, ta drenta den nos i e ta bai guia nos. Mundu mester parse shelu. Dios ta amor, pues nos tambe ta biba den amor.”

Pader Baak, a konta kon el a kore for di Haiti, pa skapa su bida. “Na Hulanda hopi ta kore pa no drenta polítika. Un konseho mi tin pa partido Demokrat, purba pa tur hende ta integrá. No separá hende for di otro. Den supermarket mi ta mira ‘voedselbank’. Esei ta un bèrgwensa pa e isla. Polítikonan tin ku boga pa un chèns nobo pa sobrebibí. Na final, ta bon pa e isla i pa nos tur. Tur momentu Clark Abraham, ke papia, pasobra e ta bon dokumentá. Mester sakudí hende. Hopi biaha, despues di elekshon, tin hopi triki. Mi tata tambe tabata polítiko aya na Hulanda. For di dje, mi a siña hustisia. Un kos mi tata a siña mi, ora mi pidi sèn e ta bisa, no ta duna pa nada. Mester tin un bon motibu. Van niets kom niets.”