KRALENDIJK- Entrante dia 18 di òktober pasahero ku ta biaha di Boneiru ku pa Kòrsou mester hasi un prueba di PCR ku no por ta mas ku 48 ora bieu. Esaki debí na e echo ku Boneiru ta konta awor komo pais di riesgo hopi haltu pa Kòrsou. 

Tòg no ta tur ora un pasahero ku ta biaha pa, òf mihó bisa via di Kòrsou mester hasi un tèst di PCR. Djaluna atardi Leslie Laplace di Curaçao Civil Aviation Authorities (CCAA) den kombersashon ku AworBonaire.nu a splika ku si e biahero djies usa aeropuerto di Kòrsou komo tránsito pa otro destinashon, un prueba di PCR, ni anti-gen no ta nesesario. 

Laplace ta konsehá tur biahero pa wak bon kiko ta eksigensianan di e pais di destinashon. Aunke kisas Kòrsou no ta eksigui e PCR, ta posibel ku e pais kaminda ta biaha bai sí ta eksigui esaki. 

Colombia

Hopi biahero for di Boneiru ta biaha pa Colombia via di Kòrsou. Ya ku Colombia no ta eksigi prueba di PCR di e biaharo, pasahero ku ta biaha for di Boneiru via Kòrsou no mester pasa un tèst. Sinembargo, e transito no mag dura mas ku 24 ora.